Dunya Uyghur qurultiyi 27‏-aprél ötküzülgen biryusséldiki namayishining "Ghelibilik" bolghanliqini élan qildi

Muxbirimiz erkin
2018-05-01
Élxet
Pikir
Share
Print

Dunya Uyghur qurultiyi bayanat élan qilip, 27‏-aprél küni bélgiye paytexti biryussélda ötküzülgen zor kölemlik namayishning "Ghelibilik" élip bérilghanliqini élan qildi. D u q bayanatida, biryusséldiki namayishni "Muhajirettiki Uyghurlarning eng zor kölemlik yighilishlirining biri" dep körsitip, u Uyghur "Herikitining izchilliqidiki bir bölünüsh nuqtisi" ikenlikini tekitligen.

27‏-Aprél her qaysi ellerdin kelgen bir qanche ming Uyghur namayishchi yawropa komissiyisining aldida toplinip, xitayning Uyghur rayonidiki "Yépiq terbiyilesh lagérliri" ni taqashni, bu lagérlardiki bir milyondek Uyghurni qoyup bérishni telep qilghan shuningdek yawropa kéngishi we yawropa komissiyisining bu ishqa arilishishini telep qilghan idi. 

Dunya Uyghur qurultiyi bayanatida, qurultay re'isi dolqun eysaning sözi neqil keltürülüp, "Bu namayish peqet bir bashlinishtur. U Uyghur xelqining tamamen oyghan'ghanliqi we ittipaqlashqanliqini körsitip berdi" déyilgen. Bayanatta yene, xelq'ara jem'iyetke yene bir qétim chaqiriq qilinip, "Biz bu yerdin yawropa ittipaqi, b d t, amérika we xelq'ara jem'iyetni bir milyondek Uyghurning xitay darliri teripidin qanunsiz tutup turulush mesilisini otturigha qoyushqa chaqirimiz" dégen. Bayanatta yene "Xitayghimu shu éniq signalni bérimiz, sen Uyghurlarni qanchilik qattiq bastursangmu, lékin bizning erkinlik, démokratiye we kishilik hoquq rohimizni sunduralmaysen".

27‏-Apirildiki namayish jeryanida dunya Uyghur qurultiyining mes'ulliri yawropa komissiyisi, yawropa ittipaqi tashqi ishlar komissariyatining yuqiri derijilik emeldarliri bilen körüshüp, ulargha "Yépiq terbiyilesh lagérliri" gha da'ir bir erzname sun'ghan hem bu lagérlarda yüz bériwatqan ishlarni tonushturghan. Yawropa komissiyisi we yawropa tashqi ishlar komissariyatidiki emeldarlarning Uyghur wekillirige qandaq jawab bergenliki melum emes. Lékin, dunya Uyghur qurultiyi bayanatida, Uyghur rehberlirining "Yawropa ittipaqini konkrét tedbir qollinip, bu zor kölemlik kishilik hoquq buzghunchiliqigha xatime bérishini telep qilghanliqi" ni bildürgen.

Toluq bet