"қарасу" (Black Water) ширкитиниң саһиби ерик принс: "шинҗаңда мәшиқ базиси ачмидуқ"

Мухбиримиз шөһрәт һошур
2019-03-13
Share

Дунядики бир қисим уруш районлирида ялланма әскәр тәминләш мулазимити билән шуғуллинип кәлгән американиң сабиқ "қарасу" (Black Water) бихәтәрлик ширкити кейинки мәзгилләрдә ширкәт намини "авангарт мулазимәт гуруһи" дәп өзгәрткән.

Мәзкур ширкәтниң йеқинқи икки йилда хитайниң йүннән өлкиси билән уйғур аптоном районида мәшиқ базиси тәсис қилип, хитай дөләт аманлиқи күчлирини тәрбийәлигәнлики хәвәр қилинған шундақла бу хәвәр хәлқара җәмийәтниң күчлүк диққитини тартқан иди.

Түнүгүн, йәни 12-март "әл-җәзирә" телевизийәсиниң мәшһур риясәтчиси мәһди һәсән мәзкур ширкәтниң саһиби ерик принс билән өткүзгән сөһбәт программисида милйонлиған инсанлар йиғивелиш лагерлириға соливелинған уйғур районида уларниң қандақларчә мәшиқ базиси тәсис қилип, хитай аманлиқ күчлирини тәрбийәлигәнлики һәққидә соал қойған. Ерик принс бу һәқтә чиққан хәвәрләрниң хаталиқини, өз ширкитиниң хитайда әскирий мәшиқ мулазимити билән әмәс, бәлки қурулуш мулазимити билән шуғуллиниватқанлиқини оттуриға қойған.

Мәһди һәсән бу һәқтики хәвәрләрни тилға алғинида ерик принс бу хәвәрләрдә тәрҗиман хаталиқи йүз бәргәнликини изаһлиған. Мәһди һәсән буниңға қарита өзиниң мәшиқ базиси һәққидики учурни хитайчә хәвәрдин әмәс, бәлки мәзкур ширкәтниң торидики инглизчә баянаттин нәқил алғанлиқини әскәрткән.

Ерик принс өз ширкитиниң уйғур райондики паалийәтлири һәққидә тохтавсиз вә қистап соралған соалларға җавабән өзлириниң хитайда бир қисим банка вә һава йоллири хадимлирини тәрбийәлигәнлики, әмма уйғур райониға бир доллар яки бир йүәнликму дәсмайә салмиғанлиқи, мәзкур районда өзлириниң һечқандақ бир паалийәт билән шуғулланмиғанлиқини тәкитлигән.

Адәттә сәзгүр темилар үстидики кәскин соаллири билән көп сандики көрүрмәнлириниң майиллиқиға еришкән мәһди һәсәнниң бу қетимқи программисиму күчлүк диққәт қозғиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт