"Qarasu" (Black Water) shirkitining sahibi érik prins: "Shinjangda meshiq bazisi achmiduq"

Muxbirimiz shöhret hoshur
2019-03-13
Élxet
Pikir
Share
Print

Dunyadiki bir qisim urush rayonlirida yallanma esker teminlesh mulazimiti bilen shughullinip kelgen amérikaning sabiq "Qarasu" (Black Water) bixeterlik shirkiti kéyinki mezgillerde shirket namini "Awan'gart mulazimet guruhi" dep özgertken.

Mezkur shirketning yéqinqi ikki yilda xitayning yünnen ölkisi bilen Uyghur aptonom rayonida meshiq bazisi tesis qilip, xitay dölet amanliqi küchlirini terbiyeligenliki xewer qilin'ghan shundaqla bu xewer xelq'ara jem'iyetning küchlük diqqitini tartqan idi.

Tünügün, yeni 12-mart "El-jezire" téléwiziyesining meshhur riyasetchisi mehdi hesen mezkur shirketning sahibi érik prins bilen ötküzgen söhbet programmisida milyonlighan insanlar yighiwélish lagérlirigha soliwélin'ghan Uyghur rayonida ularning qandaqlarche meshiq bazisi tesis qilip, xitay amanliq küchlirini terbiyeligenliki heqqide so'al qoyghan. Érik prins bu heqte chiqqan xewerlerning xataliqini, öz shirkitining xitayda eskiriy meshiq mulazimiti bilen emes, belki qurulush mulazimiti bilen shughulliniwatqanliqini otturigha qoyghan.

Mehdi hesen bu heqtiki xewerlerni tilgha alghinida érik prins bu xewerlerde terjiman xataliqi yüz bergenlikini izahlighan. Mehdi hesen buninggha qarita özining meshiq bazisi heqqidiki uchurni xitayche xewerdin emes, belki mezkur shirketning toridiki in'glizche bayanattin neqil alghanliqini eskertken.

Érik prins öz shirkitining Uyghur rayondiki pa'aliyetliri heqqide toxtawsiz we qistap soralghan so'allargha jawaben özlirining xitayda bir qisim banka we hawa yolliri xadimlirini terbiyeligenliki, emma Uyghur rayonigha bir dollar yaki bir yüenlikmu desmaye salmighanliqi, mezkur rayonda özlirining héchqandaq bir pa'aliyet bilen shughullanmighanliqini tekitligen.

Adette sezgür témilar üstidiki keskin so'alliri bilen köp sandiki körürmenlirining mayilliqigha érishken mehdi hesenning bu qétimqi programmisimu küchlük diqqet qozghighan.

Toluq bet