Antoniy bilinkén:“Awstraliyeni yalghuz qoymaymiz!”

Awstraliye hökümiti yéqindin buyan xitay hökümitining awstraliyege singip kirishi, jümlidin Uyghurlarni basturushigha qarshi keskin ipade bildürüp kéliwatqanliqi üchün xitay özining iqtisadiy jehettiki üstünlükige tayinip awstraliyeni “Qiynimaqchi” bolghanidi. Amérika tashqi ishlar ministiri antoniy bilinkén 13-may küni bu heqte mexsus söz qilip “Xitayning iqtisadiy bésimliri aldida amérika hergizmu awstraliyeni yalghuz qoymaydu” dédi.

Roytérs agéntliqining bu heqtiki xewiride éytilishiche, antoniy bilinkén muxbirlarni kütüwélish yighinida bu heqtiki so'allargha jawab bergende yuqiriqi sözni qilghan. U sözide xitayning bu xildiki iqtisadiy kozir arqiliq amérikaning yéqin ittipaqdishini “Qismaqqa almaqchi” hemde uni bozek qilmaqchi bolushtek qilmishining amérika-xitay munasiwitini téximu yamanlashturushtin bashqa roli bolmaydighanliqinimu alahide tekitlidi. Uning bu sözliri amérika prézidénti jow baydénning “Hindi-tinch okyan ittipaqi” berpa qilish arqiliq xitayning bu rayondiki zomigerlikini cheklesh siyasiti bilen bir mewqedin chiqqan, dep qaralmaqtiken.

Awstraliye hökümiti xitayning G5 téxnikisini ashkara men'iy qilghan döletlerning biri bolup, ötken yili yene tajsiman wirusining menbesini musteqil tekshürüshni telep qilghanidi. Xitay hökümiti bu ishlardin narazi bolup awstraliyening xitaygha éksport qiliwatqan mehsulatlirini bikar qilish qatarliq shekiller bilen awstraliyeni bozek qilishqa urunup kelgenidi. Awstraliye tashqi ishlar ministiri marisa payné xanimmu bu heqte söz qilip: “Biz dölitimizning bixeterliki we igilik hoquqi mesiliside héchqachan muresse qilmaymiz” dégen.