Уйғур райони бокс маһири хаңҗуда өткүзүлгән асия тәнһәрикәт мусабиқисидә алтун медалға еришкән

Уйғур райониниң қазақ бокс маһири тохтарбек таңлатқан хаңҗуда өткүзүлгән асия тәнһәрикәт мусабиқисидә филиппинлиқ рәқибини йеңип, мусабиқиниң 80 килограмлиқлардин төвән түридә алтун медалға еришкән. “мусабиқә ички хәвәрлири” ториниң 5-өктәбир бәргән хәвиридә билдүрүлүшичә, тохтарбек таңлатқан уйғур аптоном районидики бир бокс кулубида мәшиқ қилғаникән. У, бу қетимқи мусабиқидә филиппинлиқ рәқиби юмир марсиялни йеңип, 80 килограмлиқлардин төвән мәзкур бокс түриниң чемпийонлуқиға еришкән. Хәвәрдә, тохтарбекниң хитай һөкүмитиниң уйғурларға тутқан муамилиси тәнқидкә учраватқан бир вақитта бу ғәлибигә еришкәнлики, хитайниң муамилиси 2022-йили бейҗиңда өткүзүлгән қишлиқ олимпик мусабиқисиниң бәзи дөләтләр тәрипидин байқут қилинишиға сәвәб болғанлиқи тәкитләнгән.

Хәвәрдә йәнә б д т ниң өткән йили 8-айда доклат елан қилип, шинҗаңдики уйғур вә башқа мусулманларға қарита “еғир кишилик һоқуқ дәпсәндичилики” елип берилғанлиқини көрсәткән болсиму, лекин хитайниң бу доклатни рәт қилғанлиқи тәкитләнгән.

Хәвәрдә қәйт қилинишичә, тохтарбек мусабиқиниң 1-мәйданида һуҗумға учрап кәткән болсиму, лекин кейинки мәйданларда өзини руслап, олимпик мис медал саһиби болған юмир марсиялдин үстүнлүкни тартивалған. Бу, уйғур райониға мунасивәтлик маһирларниң йеқинқи 10 күн ичидә бокс яки әркин муштлишиш түрлири бойичә еришкән 2-ғәлибиси һесаблиниду. Өткән һәптә австралийәниң аделайд шәһиридә өткүзүлгән җәнубий австралийә әркин муштлишиш мусабиқисиниң 66 килограмлиқлар түридә австралийәлик уйғур маһири абдуҗелил муһәммәт чемпийонлуққа еришкәниди. “мусабиқә ички хәвәрлири” ториниң билдүрүшичә, хаңҗудики мусабиқидин кейин тохтарбек мухбирларға “бу мениң узундин бери йәтмәкчи болған арзуюм иди”, “һазир мән арзуюмниң аста-аста әмәлгә ешиватқанлиқини һес қиливатимән” дегән. Мәлум болушичә, тохтарбек бу мусабиқидә утқандин кейин, келәр йили фирансийә пайтәхти парижда өткүзүлидиған язлиқ олимпик мусабиқисигә қатнишиш салаһийитигиму еришкән.