Uyghur rayoni boks mahiri xangjuda ötküzülgen asiya tenheriket musabiqiside altun médalgha érishken

Uyghur rayonining qazaq boks mahiri toxtarbék tanglatqan xangjuda ötküzülgen asiya tenheriket musabiqiside filippinliq reqibini yéngip, musabiqining 80 kilogramliqlardin töwen türide altun médalgha érishken. “Musabiqe ichki xewerliri” torining 5-öktebir bergen xewiride bildürülüshiche, toxtarbék tanglatqan Uyghur aptonom rayonidiki bir boks kulubida meshiq qilghaniken. U, bu qétimqi musabiqide filippinliq reqibi yumir marsiyalni yéngip, 80 kilogramliqlardin töwen mezkur boks türining chémpiyonluqigha érishken. Xewerde, toxtarbékning xitay hökümitining Uyghurlargha tutqan mu'amilisi tenqidke uchrawatqan bir waqitta bu ghelibige érishkenliki, xitayning mu'amilisi 2022-yili béyjingda ötküzülgen qishliq olimpik musabiqisining bezi döletler teripidin bayqut qilinishigha seweb bolghanliqi tekitlen'gen.

Xewerde yene b d t ning ötken yili 8-ayda doklat élan qilip, shinjangdiki Uyghur we bashqa musulmanlargha qarita “Éghir kishilik hoquq depsendichiliki” élip bérilghanliqini körsetken bolsimu, lékin xitayning bu doklatni ret qilghanliqi tekitlen'gen.

Xewerde qeyt qilinishiche, toxtarbék musabiqining 1-meydanida hujumgha uchrap ketken bolsimu, lékin kéyinki meydanlarda özini ruslap, olimpik mis médal sahibi bolghan yumir marsiyaldin üstünlükni tartiwalghan. Bu, Uyghur rayonigha munasiwetlik mahirlarning yéqinqi 10 kün ichide boks yaki erkin mushtlishish türliri boyiche érishken 2-ghelibisi hésablinidu. Ötken hepte awstraliyening adélayd shehiride ötküzülgen jenubiy awstraliye erkin mushtlishish musabiqisining 66 kilogramliqlar türide awstraliyelik Uyghur mahiri abdujélil muhemmet chémpiyonluqqa érishkenidi. “Musabiqe ichki xewerliri” torining bildürüshiche, xangjudiki musabiqidin kéyin toxtarbék muxbirlargha “Bu méning uzundin béri yetmekchi bolghan arzuyum idi”, “Hazir men arzuyumning asta-asta emelge éshiwatqanliqini hés qiliwatimen” dégen. Melum bolushiche, toxtarbék bu musabiqide utqandin kéyin, kéler yili firansiye paytexti parizhda ötküzülidighan yazliq olimpik musabiqisige qatnishish salahiyitigimu érishken.