12-Ноябирдики «шәрқий түркистан җумһурийәт күни» дә бостон шәһәр мәркизидә байрақ чиқириш паалийити өткүзүлидикән

Мухбиримиз ирадә
2019-11-07
Елхәт
Пикир
Share
Принт

Муһаҗирәттики уйғурлар һәр йили иптихарлиқ ичидә қутлайдиған байрамлардин болған «җумһурийәт күни» ни, йәни 1933-йили вә 1944-йили уйғурлар икки қетимлиқ миллий мустәқиллиқ инқилаби җәрянида қуруп чиққан «шәрқий түркистан җумһурийити» дуняға кәлгән 12-ноябир хатирә күнини охшаш болмиған шәкилләрдә қутлашқа һазирланмақта.

Шуларниң ичидә алаһидә диққәт қозғайдиғини шуки, американиң тарихий шәһәрлиридин бири болған бостон шәһәр мәркизидә өткүзүлидиған шәрқий түркистанниң ай-юлтузлуқ көк байриқини чиқириш паалийитидур. 

Америка уйғур бирләшмисиниң бу һәқтики уқтурушиға қариғанда, мәзкур паалийәт бостонда тинимсиз паалийәт қиливатқан пәхирлик уйғур алимәси, масачуссетс технологийә институти (MIT) ғол һүҗәйрә тәтқиқат мәркизиниң директори майсәм мутәллипова ханим вә шундақла мунәввәр абдулла қатарлиқ бостондики уйғурларниң күч чиқириши билән вуҗудқа чиқирилған. 12-Ноябир күни чүш саәт 12 дә өткүзүлидиған паалийәттә шәһәр мәркизи мәйданида шәрқий түркистанниң ай-юлтузлуқ көк байрақ чиқирилғандин башқа йәнә уйғурларниң миллий сәнәт номурлириму орундиликән. 

Майсәм ханим паалийәт һәққидә фейисбукта чиқарған уқтурушида зор симовллуқ түскә игә болған мәзкур паалийәтниң бостон шәһиридә өткүзүлүшиниң тарихий характерлиқ әһмийәткә игә болидиғанлиқини илгири сүргән. 

Бостон америкадики тарихи шәһәрләрдин болуп, у американиң мустәқиллиқ инқилабиниң башлиниш ноқтиси шундақла мәдәнийәт вә маарип мәркизи. Нурғунлиған хәлқаралиқ чоң университетларниң макани болған бостон шәһири хәлқарадики алий маарип мәркизи, дәпму атилиду.

Пикирләр (0)
Share
Толуқ бәт