Өзбекистан чегра сақчилири қазақистанда турушлуқ паалийәтчи йевгини бунинни ташкәнт айродромида тосувалған

Мухбиримиз әркин
2019-11-08
Елхәт
Пикир
Share
Принт

Өзбекистан даилири өткән һәптә қазақистанда турушлуқ русийәлик кишилик һоқуқ паалийәтчиси йевгини бунинни ташкәнт айродромида тосувелип, униң өзбекистанға киришигә йол қоймиған.

Б б с ниң хәвәр қилишичә, йевгини бонин өткән җүмә күни алмутадин айропиланға олтуруп, ташкәнт айродромиға қонғанда өзбекистан чегра даирилири тәрипидин тосуп қелинған. Уйғурларға ген бонин дегән исим билән тонулған йевгини бонин «шаһит биз‏» намлиқ тор бекити қуруп, хитайниң йиғивелиш лагерлиридики уйғур, қазақ вә башқа мусулманлар тутқунлар тоғрисида учур топлаватқан вә буни дуняға елан қилип, хитай вә оттура асия җумһурийәтлириниң диққитини қозғап келиватқан актип кишилик һоқуқ паалийәтчилириниң биридур. 

Униң б б с ға билдүрүшичә, өзбекистан чегра даирилири гени бунинға униң чеградин чиқириветилгәнлики һәққидә бир парчә қәғәзни тутқузуп, алмутаға қайтурувәткән. Лекин қәғәздә униң нимә үчүн чеградин чиқириветилгәнликигә һечқандақ чүшәнчә берилмигән. У буниң сәвәбини сориған болсиму, лекин даириләр буниң сәвәбини өзбекистан ташқий ишлар министирлиқиға телефон қилип шулардин сорашни буйруған.

Гени бунинниң 8‏-ноябир күни фейсбукта елан қилған учуридин мәлум болушичә, у 8‏-ноябир күни өзбекистан ташқи ишлар министирлиқиға телефон қилип, буниң сәвәбини сориған болсиму, лекин уларму буниңға җаваб бәрмигән. Өзбекистан ташқий ишлар министирлиқиниң хадими буниң сәвәбини өзбекистан ичкий ишлар министирлиқидин сорашни, бу ишниң ташқий ишлар министирлиқи билән алақиси йоқлиқини илгири сүргән.

Көзәткүчиләрниң қәйт қилишичә, гени бунинниң өзбекистанға киргүзүлмәслики униң лагердики уйғур вә қазақ тутқунлар һәққидә елип бериватқан паалийити билән мунасивәтлик икән. Өзбекистан хитайниң уйғур районидики бастуруш сияситини изчил қоллап кәлгән дөләтләрниң бири. У йеқинда шималий корейә, венезуела, сүрийә, русийә қатарлиқ дөләтләр билән б д т кишилик һоқуқ кеңишигә хәт йезип, хитайниң уйғур районидики сияситини қоллайдиғанлиқини билдүргән иди.

Толуқ бәт