Özbékistan chégra saqchiliri qazaqistanda turushluq pa'aliyetchi yéwgini buninni tashkent ayrodromida tosuwalghan

Muxbirimiz erkin
2019-11-08
Élxet
Pikir
Share
Print

Özbékistan da'iliri ötken hepte qazaqistanda turushluq rusiyelik kishilik hoquq pa'aliyetchisi yéwgini buninni tashkent ayrodromida tosuwélip, uning özbékistan'gha kirishige yol qoymighan.

B b s ning xewer qilishiche, yéwgini bonin ötken jüme küni almutadin ayropilan'gha olturup, tashkent ayrodromigha qon'ghanda özbékistan chégra da'iriliri teripidin tosup qélin'ghan. Uyghurlargha gén bonin dégen isim bilen tonulghan yéwgini bonin "Shahit biz‏" namliq tor békiti qurup, xitayning yighiwélish lagérliridiki Uyghur, qazaq we bashqa musulmanlar tutqunlar toghrisida uchur toplawatqan we buni dunyagha élan qilip, xitay we ottura asiya jumhuriyetlirining diqqitini qozghap kéliwatqan aktip kishilik hoquq pa'aliyetchilirining biridur. 

Uning b b s gha bildürüshiche, özbékistan chégra da'iriliri géni bunin'gha uning chégradin chiqiriwétilgenliki heqqide bir parche qeghezni tutquzup, almutagha qayturuwetken. Lékin qeghezde uning nime üchün chégradin chiqiriwétilgenlikige héchqandaq chüshenche bérilmigen. U buning sewebini sorighan bolsimu, lékin da'iriler buning sewebini özbékistan tashqiy ishlar ministirliqigha téléfon qilip shulardin sorashni buyrughan.

Géni buninning 8‏-noyabir küni féysbukta élan qilghan uchuridin melum bolushiche, u 8‏-noyabir küni özbékistan tashqi ishlar ministirliqigha téléfon qilip, buning sewebini sorighan bolsimu, lékin ularmu buninggha jawab bermigen. Özbékistan tashqiy ishlar ministirliqining xadimi buning sewebini özbékistan ichkiy ishlar ministirliqidin sorashni, bu ishning tashqiy ishlar ministirliqi bilen alaqisi yoqliqini ilgiri sürgen.

Közetküchilerning qeyt qilishiche, géni buninning özbékistan'gha kirgüzülmesliki uning lagérdiki Uyghur we qazaq tutqunlar heqqide élip bériwatqan pa'aliyiti bilen munasiwetlik iken. Özbékistan xitayning Uyghur rayonidiki basturush siyasitini izchil qollap kelgen döletlerning biri. U yéqinda shimaliy koréye, wénézu'éla, süriye, rusiye qatarliq döletler bilen b d t kishilik hoquq kéngishige xet yézip, xitayning Uyghur rayonidiki siyasitini qollaydighanliqini bildürgen idi.

Toluq bet