Amérika dölet mejlis ezaliri xitayning ikki chong bataréye ishlepchiqarghuchi shirkitini “Uyghur mejburiy emgikige chétishliq” dep eyibligen

Washin'gtondin muxbirimiz irade teyyarlidi
2024.06.06

Amérika-xitay istratégiyelik riqabet pewqul'adde komitétining re'isi, jumhuriyetchiler partiyesining ezasi jon molénar (John Moolenaar) xitay hökümitining Uyghurlargha qaritiwatqan irqiy qirghinchiliqi hemde mejburiy emgek siyasitige yantayaq boluwatqan ikki xitay shirkitini ashkarilighan.

U, amérika ana weten xewpsizliki ministirliqigha mexsus xet ewetip, xitayning asasliq bataréye ishlepchiqarghuchiliri bolghan xéfiy goshuwen yuqiri téxnika énérgiye cheklik shirkitining bash guruhi “Gotyon guruhi” (Gotion) we “Ningdé téxnologiye cheklik shirkiti” (CATL) ge chétishliq yéngi ispatlar bilen teminligen.

U yuqiriqi bu ikki shirketning xitay xelq azadliq armiyesining qollishidiki orunlar bolushigha, shundaqla ularning Uyghur qul emgikidin paydilinishni dawamlashturuwatqan shirketler bolushigha qarimay, ularning amérikada tijaret qilishigha yol qoyuluwatqanliqini tenqidligen.

U, Uyghur mejburiy emgiki bilen ishlen'gen herqandaq mehsulatning amérikagha kirishining qet'iy men'i qilinidighanliqini eskertip, yuqiriqi bu shirketlerni amérikaning “Soda qara tizimliki” ge kirgüzüshni telep qilghan.

Amérika ana weten xewpsizliki ministirliqigha ewetilgen bu mektupqa amérika kéngesh palata ezasi marko rubiyo, awam palata ezaliridin mark grén, karlos giménéz we awam palata ezasi dérin laxudlarmu awaz qoshqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.