CECC Xitayning Uyghur qirghinchiliqini jawabkarliqqa tartishni telep qildi

Washin'gtondin muxbirimiz erkin teyyarlidi
2024.05.13

Amérika dölet mejlisining xitay ishliri ijra'iye komitéti (CECC) 13-may küni yilliq doklat élan qilip, xitayning Uyghur diyaridiki heqler depsendichilikining dawam qiliwatqanliqini körsitip ötken. Shuningdek amérika hökümiti we dölet mejlisining buninggha qarshi jiddiy tedbirlerni élishini telep qilghan.

Doklatta qeyt qilinishiche, ötken bir yilda élan qilin'ghan doklatlar ilgiri tutqun qilin'ghan türkiy tilliq musulmanlarning uzun muddetlik qamaq jazalirigha höküm qilin'ghanliqini körsetken؛ da'iriler rayonda mejburiy emgek sistémisini qurup, sabiq lagér tutqunlirini we bashqa türkiy tilliq musulmanlarni mejburiy emgekke orunlashturghan. Doklatta, rayondiki mejburiy emgek sistémisining ikki xil shekilde dawamlishiwatqanliqi, bulardin birining sabiq lagér tutqunliridin teshkil qilin'ghanliqi, yene birining “Yötkep ishqa orunlashturush arqiliq namratliqtin qutquzush” namida élip bériliwatqanliqi bildürülgen.

Doklatta qeyt qilinishiche, bu mezgilde yene xitay hökümitining Uyghurlarni xitaylar bilen toylishishqa mejburlishimu kücheygen. Mezkur doklatta yene amérika dölet mejlisi we hökümiti üchün Uyghurlar mesilisini chöridigen halda bir qatar tewsiyeler otturigha qoyulghan. Bu tewsiyeler amérika qanunidiki insaniyetke qarshi jinayet uqumi we uni jazalashqa chüshenche bérish, kanada we bashqa ittipaqdash döletler bilen Uyghur musapirliri mesilisi boyiche maslashturush guruppisi qurush, “Uyghur kishilik hoquq siyasiti qanuni” ni toluq ijra qilish, ittipaqdash we shérik döletler bilen hemkarliship, chet'eldiki Uyghur we bashqa türkiy xelqlerni xitayning chégra halqighan basturushidin qoghdash, Uyghur, qazaq we bashqa türkiy musulmanlarni amérikigha qobul qilishni aldin oylishish, mexsus tür ajritip, sabiq lagér tutqunlirigha yardem bérish qatarliqlarni öz ichige alghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.