Чен чүәнгониң вәзиписиниң төвәнлиши униң келечәкигә болған һәр хил қиясларни пәйда қилди

Хәлқарада уйғурларға қаритилған “ирқий қирғинчилиқ” ниң баш ‍иҗрачиси, дәп қаралған уйғур аптоном районлуқ парткомниң сабиқ секретари чен чүәнгониң вәзиписиниң төвәнлиши, хәлқара таратқуларда униң келәчикигә болған һәр хил қиясларни пәйда қилғаниди.

Шинхуа агентлиқиниң йеқинда елан қилған хәвиридин, өткән йили 12-айда уйғур аптоном районлуқ парткомниң секритарлиқ вәзиписидин туюқсиз йөткәп кетилгән чен чүәнгониң, нөвәттә хитай компартийәси мәркизи йеза хизмити рәһбәрлик гурупписиниң муавин башлиқлиқиға тәйинләнгәнлики мәлум болған.

Чен чүәнго өткән йили туюқсиз йөткәп кетилгәндә хитай таратқулири униң башқа бир вәзипигә қоюлидиғанлиқини ейтқан, әмма қандақ вәзипигә қоюлидиғанлиқини тилға алмиғаниди. Шинхуа агентлиқиниң хәвиридә қәйт қилинишичә, чен чүәнго 6-айниң 14-күни бейҗиңда өткүзүлгән йеза ‍игилик, йеза вә деһқанлар мәсилиси һәққидики йиғиниға мәркизи йеза хизмити рәһбәрлик гурупписиниң муавин башлиқи сүпитидә қатнашқан.

“никкей асия” журнилиниң бир хәвәр мәнбәсидин нәқил кәлтүрүп бәргән бу һәқтики хәвиридә, хитайниң мәмликәтлик хәлқ қурултийи ечилиш һарписидики бу мәнзирә униң һоқуқиниң төвәнлигәнлики, 66 яшлиқ чен чүәнгониң буниңдин кейин партийә рәһбәрлириниң алдинқи қатаридин орун алмаслиқи мүмкинликии билдүрүлгән.

Чен чүәнго 2017-йили уйғурларға қарита башланған кәң көләмлик бастуруш, ‍омумйүзлүк лагерларға қамаш, аялларға басқунчилиқ қилиш, туғмас қилиш, мәҗбурий әмгәккә селиш, ирқий қирғинчилиқ вә инсанийәткә қарши җинайәтниң баш иҗрачиси, дәп қарилип, америка, канада, әнглийә вә явропа иттипақи тәрипидин җазаланған әң юқири дәриҗилик хитай әмәлдари болған. Өткән айда әнглийәдики гуруппилар чен чүәнгониң рәсимини коча елан тахтилириға чаплап, әнглийә һөкүмитидин уни қолға елишни тәләп қилған. Бәзи ‍анализчиларниң ейтишичә, хитай ғәрб билән болған мунасивәтни юмшитиш үчүн чен чүәнгони пассип бир вәзипигә йөткигән.