Chén chüen'goning wezipisining töwenlishi uning kéléchekige bolghan her xil qiyaslarni peyda qildi

Xelq'arada Uyghurlargha qaritilghan “Irqiy qirghinchiliq” ning bash ‍ijrachisi, dep qaralghan Uyghur aptonom rayonluq partkomning sabiq sékrétari chén chüen'goning wezipisining töwenlishi, xelq'ara taratqularda uning kélechikige bolghan her xil qiyaslarni peyda qilghanidi.

Shinxu'a agéntliqining yéqinda élan qilghan xewiridin, ötken yili 12-ayda Uyghur aptonom rayonluq partkomning sékritarliq wezipisidin tuyuqsiz yötkep kétilgen chén chüen'goning, nöwette xitay kompartiyesi merkizi yéza xizmiti rehberlik guruppisining mu'awin bashliqliqigha teyinlen'genliki melum bolghan.

Chén chüen'go ötken yili tuyuqsiz yötkep kétilgende xitay taratquliri uning bashqa bir wezipige qoyulidighanliqini éytqan, emma qandaq wezipige qoyulidighanliqini tilgha almighanidi. Shinxu'a agéntliqining xewiride qeyt qilinishiche, chén chüen'go 6-ayning 14-küni béyjingda ötküzülgen yéza ‍igilik, yéza we déhqanlar mesilisi heqqidiki yighinigha merkizi yéza xizmiti rehberlik guruppisining mu'awin bashliqi süpitide qatnashqan.

“Nikkéy asiya” zhurnilining bir xewer menbesidin neqil keltürüp bergen bu heqtiki xewiride, xitayning memliketlik xelq qurultiyi échilish harpisidiki bu menzire uning hoquqining töwenligenliki, 66 yashliq chén chüen'goning buningdin kéyin partiye rehberlirining aldinqi qataridin orun almasliqi mümkinliki'i bildürülgen.

Chén chüen'go 2017-yili Uyghurlargha qarita bashlan'ghan keng kölemlik basturush, ‍omumyüzlük lagérlargha qamash, ayallargha basqunchiliq qilish, tughmas qilish, mejburiy emgekke sélish, irqiy qirghinchiliq we insaniyetke qarshi jinayetning bash ijrachisi, dep qarilip, amérika, kanada, en'gliye we yawropa ittipaqi teripidin jazalan'ghan eng yuqiri derijilik xitay emeldari bolghan. Ötken ayda en'gliyediki guruppilar chén chüen'goning resimini kocha élan taxtilirigha chaplap, en'gliye hökümitidin uni qolgha élishni telep qilghan. Bezi ‍analizchilarning éytishiche, xitay gherb bilen bolghan munasiwetni yumshitish üchün chén chüen'goni passip bir wezipige yötkigen.