Chén chüen'goning qeshqerde “Nanchiliq kespini yenimu kéngeytish” ni tekitlishi diqqet qozghidi

Xitayning “Tengritagh tori” ning xewiridin melum bolushiche, 3 ـ noyabir küni, Uyghur rayonluq partkomning séikritari chén chüen'go qeshqer wilayitige bérip, u yerde “Shi jinpingning sözini öginish, partiye shinjang xizmiti yighinining rohini izchillashturush we bash nishanni emeliyleshtürüsh” ni tekitligen.

Diqqet qozghaydighini, chén chüen'go qeshqerdiki ziyaritide mexsus qeshqerdiki “Nanchiliq kespiy yémeklik pay cheklik shirkiti” ni ziyaret qilghan bolup, u bu yerde “Nanchiliq kespining kölemlishish, kesiplishish, bazarlishish sewiyesini üzlüksiz östürüp, téximu köp ammining yéqin etrapta, öz jayida ishqa orunlishishi, kirimini muqim ashurup béyishigha türtke bolush kérek” dégen.

Xitay da'iriliri yéqinqi yillardin buyan Uyghurlarning yekke igilikidiki nawayliq kespini cheklep, ularni shirketler namida zawutlargha yighiwalghanidi. Uyghur élidiki nanchiliq sahesi Uyghurlar mejburiy emgekke sélinidighan sorunlargha aylinip qalghan bir peytte, chén chüen'goning bu saheni yenimu kéngeytip, yenimu köp kishini “Ishqa orunlashturushni” tekitlishi diqqet qozghidi.

Xewerdin qarighanda, chén chüwen'go yene, “Qeshqer téxnik instituti” we “Qeshqer iqtisadiy tereqqiyat rayoni” nimu ziyaret qilip sodiger chaqirishni, meblegh jelp qilishni kücheytish we bu arqiliq ishqa orunlishishni tézlitish heqqide söz qilghan. Xewerde yene, chén chüen'goning qeshqer shehirining paxtekle yézisi yuqiriqi qaqulla kentidiki bir Uyghur a'ilisini ziyaret qilip, ulardin “Partiyege minnetdarliq bildürüp, partiyening gépini anglap, partiyege egiship méngish we yenimu köp emgek qilishni” telep qilghanliqi bayan qilin'ghan.

Chén chüen'go qeshqerdiki ziyaritide atalmish “Xas, ewzel kesiplerni küchep tereqqiy qildurup, zoraytip, ishqa orunlashturushni yönilish qilishta ching turush kérek. . .” dégenni tekitlishi közetküchiler teripidin Uyghurlarni “Kesipy maharet bilen terbiyelesh” namidiki tutqun qilish, yighiwélish we mejburiy emgekke sélish heriketlirining yenimu küchiyidighanliqining béshariti, dep qaralmaqta.