Чен чүәнго қоли сунуп кәткән бир балини давалиған дохтурни мукапатлап, “хәлқниң һаяти һәммидин үстүн” дәп тәшвиқ қилған

Хитай таратқулириниң хәвәр қилишичә, уйғур аптоном районлуқ һөкүмәт 11-май күни илғар шәхсләрни мукапатлаш чоң йиғини ечип, хотәнлик бир балини қутулдуруп, униң қолини давалиған дохтурни алаһидә тәшвиқ қилған.

Уйғур аптоном районлуқ парткомниң секритари чен чүәнго бу йиғинда қилған сөзидә мундақ дегән: “қоли сунуп кәткән балини давалаш кишиниң йүрикини җиғилдитидиған бир мәйдан җанни қутқузуш һәрикити, әң чоң хәтәрдин атлиған һаятлиқ мөҗизиси, һаяти күчкә толуп ташқан иҗабий ениргийәниң җуғлиниши, қол билән тутуп өрнәк алғудәк җанлиқ дәрс болди. Бу бир мәйдан һаятлиқ үчүн күч улап йүгүрүш, һәммидә хәлқни асас қилиш идийәсини, шундақла һаятлиқниң вә хәлқниң һәммидин үстүн туридиғанлиқини намайән қилди”.

Көзәткүчиләрниң қаришичә, хәлқарада “ирқий қирғинчилиқниң актип иҗрачиси” вә “җаллат” дәп сүпәтлиниватқан чен чүәнгониң бу сөзлири униң өзини ақлашқа бирәр баһанә издәватқанлиқини көрситиду. Милйонлиған уйғурни лагерға солап, қийнап, өлтүрүп, балилирини йетим қилған хитай компартийәсиниң бу йоқири дәриҗилик әмәлдарниң бир балиниң қолини давалашқа бунчә көңүл бөлүп кетиши вә чоң йиғин ечип алаһидә тәқдирлиши учиға чиққан сахтилиқ һәм көз боямчилиқтур. Өөзәткүчиләр йәнә нәччә миңлиған уйғурниң бешиға чиққан вә давамлиқ адәм өлтүрүватқан бу “җаллат” ниң чоң йиғинда “хәлқ һаяти һәммидин үстүн” дәп җар селиши тамамән ялғанчилиқ вә номуссизлиқтур; у өзини сахта тәшвиқатлирида ақлиялиған билән, хәлқарада йәнила “мустәбит җаллат” дәп қарилиду вә униң җинайити тарихиниң ләнәт түврүкигә миқлиниду, дәп қаримақта.