Chén chüen'go qoli sunup ketken bir balini dawalighan doxturni mukapatlap, “Xelqning hayati hemmidin üstün” dep teshwiq qilghan

Xitay taratqulirining xewer qilishiche, Uyghur aptonom rayonluq hökümet 11-may küni ilghar shexslerni mukapatlash chong yighini échip, xotenlik bir balini qutuldurup, uning qolini dawalighan doxturni alahide teshwiq qilghan.

Uyghur aptonom rayonluq partkomning sékritari chén chüen'go bu yighinda qilghan sözide mundaq dégen: “Qoli sunup ketken balini dawalash kishining yürikini jighilditidighan bir meydan janni qutquzush herikiti, eng chong xeterdin atlighan hayatliq möjizisi, hayati küchke tolup tashqan ijabiy énirgiyening jughlinishi, qol bilen tutup örnek alghudek janliq ders boldi. Bu bir meydan hayatliq üchün küch ulap yügürüsh, hemmide xelqni asas qilish idiyesini, shundaqla hayatliqning we xelqning hemmidin üstün turidighanliqini namayen qildi”.

Közetküchilerning qarishiche, xelq'arada “Irqiy qirghinchiliqning aktip ijrachisi” we “Jallat” dep süpetliniwatqan chén chüen'goning bu sözliri uning özini aqlashqa birer bahane izdewatqanliqini körsitidu. Milyonlighan Uyghurni lagérgha solap, qiynap, öltürüp, balilirini yétim qilghan xitay kompartiyesining bu yoqiri derijilik emeldarning bir balining qolini dawalashqa bunche köngül bölüp kétishi we chong yighin échip alahide teqdirlishi uchigha chiqqan saxtiliq hem köz boyamchiliqtur. Öözetküchiler yene nechche minglighan Uyghurning béshigha chiqqan we dawamliq adem öltürüwatqan bu “Jallat” ning chong yighinda “Xelq hayati hemmidin üstün” dep jar sélishi tamamen yalghanchiliq we nomussizliqtur؛ u özini saxta teshwiqatlirida aqliyalighan bilen, xelq'arada yenila “Mustebit jallat” dep qarilidu we uning jinayiti tarixining lenet tüwrükige miqlinidu, dep qarimaqta.