Чен чүәнго нөвәттики вәзийәтниң давамлишидиғанлиқидин бешарәт бәрди

Уйғур дияридики биринчи номурлуқ әмәлдар болған чен чуәнго 18-июн күни турпан вилайитидә аталмиш “хизмәт тәкшүрүши” дә болғанда “ши җинпиңниң йеңи дәврдики хитайчә алаһидиликкә игә сотсиялизм идийисини чоңқур өгиниш һәмдә ‛әҗдадларниң арзусини унтумаслиқ‚ темисидики тәрбийә хизмитини омумлаштуруш” һәққидә көрсәтмә бәргән.

У “тәкшүрүш” җәрянида аталмиш “хәлққә қулайлиқ сақчи понкитлири” ни көздин кәчүргән һәмдә бу җайларниң иҗтимаий муқимлиқни қоғдаштики муһим ролиға юқири баһа бәргән. Арқидинла у диний затларни қобул қилип уларға “динни хитайчилаштуруш” ниң муһимлиқи һәққидә көрсәтмә бәргән.

Чен чуәнго һәрқайси йезиларни көздин кәчүрүш җәрянида изчил һалда “партийә мәркизий комитетиниң шинҗаңни идарә қилиш истратегийисини әстайидил өгиниш вә изчиллаштуруш”, “ши җинпиңниң шинҗаң хизмити һәққидики муһим йолйоруқлириниң роһини әмәлгә ашуруш” һәққидә сөз қилған. Шуниң билән биргә бу хизмәтләрни “муқимлиқ хизмити билән баравәр қанат яйдуруш” ни тәкитлигән.

Анализчилар бу әһвалларни омумлаштуруп “бу һал хитай һөкүмитиниң уйғур дияридики сиясий бастуруш һәрикити техиму кәң көләмдә давам қилидиғанлиқиниң бешарити,” деди.