Xitay “Shinjang hékayisini yaxshi sözlesh” te nishani chet'elning yash xitayshunaslirigha qaratqan

• Washin'gtondin muxbirimiz erkin teyyarlidi
  2023-10-13

Xitay hökümiti amérika we bezi gherb parlaméntlirining Uyghur irqiy qirghinchiliqini étirap qilishigha qarshi bashlighan “Shinjang hékayisini yaxshi sözlesh” te nishanini chet'ellik yash xitayshunaslargha qaratqan. Xitay taratqulirining xewer qilishiche, xitay da'iriliri 21 dölettin kelgen 23 neper chet'ellik yash xitayshunasni ürümchige yighip, shinjang pédagogika uniwérsitétida “Chet'ellik yash xitayshunaslarni terbiyelesh shinjang sinipi” achqan. Shinxu'a agéntliqining bergen bu heqtiki xewiride, chet'ellik “Yash xitayshunaslarni terbiyelesh shinjang sinipi” ning échilish murasimi 13-öktebir ötküzülgenliki, bu pa'aliyetni xitay medeniyet-sayahet ministirliqi, xitay chet'el medeniyet almashturush merkizi, Uyghur aptonom rayonluq medeniyet-sayahet nazariti we shinjang pédagogika uniwérsitéti birliship uyushturghanliqini bildürgen.

 Shinxu'a agéntliqining qeyt qilishiche, échilish murasimida birleshme ereb xelipiliki, özbékistan, gérmaniye, filippin, argéntinadin kelgen besh neper yash xitayshunas “Özlirining kechürmishliri we tetqiqat saheliri boyiche xitay toghrisidiki hékayilirini sözlep ötken. Xitayning chet'ellik yash xitayshunaslarni ürümchige yighip, ulargha “Shinjang sinipi” échishi, uning chet'el ijtima'iy taratqu supiliridin paydilinip, gherb döletlirining Uyghur irqiy qirghinchiliqini jawabkarliqqa tartishigha qarshi qozghighan xelq'aragha “Shinjang hékayesini yaxshi sözlesh” herikitining yéngi bir basquchqa ötkenlikini körsitidu, dep qaralmaqta.

Shinxu'a agéntliqini bildürüshiche, 21 kün dawamlishidighan bu kursta “Yétekchi oqutquchilar léksiye sözlesh bilen neq meydan ziyaritini birleshtürüp terbiyelesh endizisini qollinidiken. ”

Xewerde, “Shinjang sinipi” gha birleshme ereb xelipiliki, özbékistan, gérmaniye, filippin, argéntinadin bashqa éfiyopiye, misir, rusiye qatarliq 21 dölettin kelgen yash xitayshunaslarning qatnashqanliqi bildürülgen.