Washin'gton pochtisi: “Béyjing Uyghurlargha awstraliyege qeder bérip parakendichilik salmaqta”

“Washin'gton pochtisi” géziti awstraliyediki Uyghurlar heqqide xewer bérip, xitayning awstraliyege qeder bérip, bu dölettiki Uyghurlargha parakendichilik séliwatqanliqini bildürdi. Xewerde, xitay da'irilirining awstraliyede olturushluq reshide abdughopur isimlik Uyghurning yurtidiki dadisi we inisini yighiwélish lagérigha qamishi, anisini görüge élip, reshidege parakendichilik sélish weqesi arqiliq xitayning awstraliyediki Uyghurlarni kontrol qilishqa urunuwatqanliqi échip bérilgen. Xewerde bayan qilinishiche, bu, reshide abdughopur we bashqa Uyghurlar özini qachurup kelgen bir xeter bolsimu, lékin béyjingning qoli ulargha qeder yétip barmaqta iken. Xewerde, b d t ning melumati neqil keltürülüp, xitayning bir milyondek Uyghurni yighiwélish lagérlirida tutup turuwatqanliqi, uning deslepki mezgilde bu lagérlarning mewjutluqini inkar qilghan bolsimu, lékin ötken yildin bashlap uni aqlashqa kirishkenliki tekitlen'gen.

Xewerde, buning awstraliyediki Uyghurlarning naraziliqini qozghighanliqi, ularning ötken jüme küni mélborin, adilayd, sidnéy qatarliq sheherlerde namayish qilip, yurtidiki Uyghurlarning teqdirige we xitayning chet'eldiki Uyghurlargha parakendilik sélishigha naraziliq bildürgenliki ilgiri sürülgen. Xewerde bayan qilinishiche, xitayning qilmishi awstraliyediki Uyghurlarda psixikiliq bésim peyda qilghan. 

Xewerde, ular ziyaret qilghan Uyghurlarning hemmisi dégüdek xitayning uruq-tughqanlirini tutqun qilishi we ulargha parakendichilik sélishi ularda rohiy zerbe we ensizlik tuyghusi peyda qilghanliqini bildürgenliki tekitlen'gen. Xewerde bayan qilinishiche, “Washin'gton pochtisi” géziti muxbiri awstraliye tashqi ishlar ministirliqi we xitayning kanbérradiki elchixanisidin ularning inkasini sorighan bolsimu, lékin her ikki orun jawab bermigen.