Чехийә җумһурийити парламенти хитайниң уйғурларға "ирқий қирғинчилиқ" қиливатқанлиқини елан қилди

Мухбиримиз әркин
2021-06-14
Share

Чехийә җумһурийити парламентиниң кеңәш палатаси қарар мақуллап, хитайниң уйғурларға қарита "ирқий қирғинчилиқ" вә "инсанийәткә қарши җинайәт" садир қиливатқанлиқини елан қилған. Буниң билән чехийә хитайниң уйғурларға тутқан муамилисини "ирқий қирғинчилиқ" дәп тониған 6-ғәрб парламенти яки дөләт аппаратлириниң бири болди. Мәлум болушичә, ‍өткән пәйшәнбә күни авазға қоюлған қарар лайиһәси нөлгә қарши 38 аваз билән мақулланған.

Қарар лайиһәсидә "хитай хәлқ җумһурийитидә болупму тибәт вә шинҗаң аптоном районлирида кишилик һоқуқ вә әркинликкә кәң көләмлик хилаплиқ қилиш, ирқий қирғинчилиқ, инсанийәткә қарши җинайәт вә етник кәмситиш йүз бәрмәктә шундақла мәдәнийәт, диний вә сиясий кимлик бастурулмақта" дейилгән.

Қарар лайиһәсидә йәнә чехийә һөкүмити 2022-йилдики бейҗиң қишлиқ олимпик мусабиқисигә дипломатик байқут ‍елан қилишқа чақирилип, "чехийә җумһурийити һөкүмити вә башқа сиясий вәкиллириниң хитай хәлқ җумһурийитидики олимпик мусабиқилиригә қатнишиш тәклиплирини рәт қилиши" тәләп қилинған.

Қарар лайиһәсидә көрситилишичә, ‍уларниң бу мусабиқигә қатнишиши хитайниң негизлик кишилик һоқуқни техиму кәмситиш, униңға хилаплиқ қилиш вә бастурушни қанунлаштуруши үчүн суйиистемал қилишиға йол ачидикән. Чехийә кеңәш палатасиниң қарари буниңға охшаш бир қарар лайиһәси белгийә парламентида ‍авазға қоюлушниң алдида мақулланған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт