Amérika merkiziy axbarat idarisi xitaygha taqabil turush üchün alahide xizmet guruppisi qurmaqchi iken

Muxbirimiz jewlan
2021-08-13
Share

Ehwaldin xewerdar shexslerning ashkarilishiche, amérika merkiziy axbarat idarisi (CIA) amérikaning eng chong istratégiyelik reqibi bolghan xitayning ehwalini téximu yaxshi igilesh üchün "Xitay ishliri merkizi" qurmaqchi iken.

"Blombérg" torining xewirige qarighanda, bu teklipni amérika merkiziy axbarat idarisining bashliqi williyam burnis otturigha qoyghan. Eger "Xitay ishliri merkizi" qurulup qalsa, amérika merkiziy axbarat idarisining muhim menbeliridin eng bashta behrimen bolidighan musteqil organ bolidiken. Shundaq bolghandila xitaygha munasiwetlik ishlarda adem küchi, bayliq we siyasetchilerni qolgha keltürüsh jehette aktip rol oyniyalaydiken.

Amérika merkiziy axbarat idarisining bir bayanatida mundaq déyilgen: "Xuddi williyam burnis éytqandek, xitaygha taqabil turush uning birinchi wezipisi. Amérika merkiziy axbarat idarisi hazir bu wezipini qandaq qilghanda yaxshi orunlashning emeliy pilanlirini tüzüwatidu".

Amérika merkiziy axbarat idarisidiki bir xadimning ashkarilishiche, bu organdiki kishilerning köpinchisi musteqil bir xitay ishliri merkizi qurushning zörürlükini hés qilghan bolsimu, bügün'giche birersi heriketke ötmigen iken.

Amérika merkiziy axbarat idarisining hazirqi bashliqi wilyam burnis tejribilik diplomat bolup, "Xitayning meqsiti amérikaning ornini élip, dunyadiki eng küchlük we eng tesiri chong döletke aylinish" dégen؛ xitayning düshmenlik we zorawanliq bilen dunyagha hakim bolushqa urunushlirini amérika üchün tehdit dep qarighan. U amérika dölet mejlisi istixbarat komitétigha qilghan sözide: "Amérika merkiziy axbarat idarisi üchün éytqanda, xitay ishliri merkizi qurush, xitay mutexesisliri qoshunini dawamliq kücheytish salmiqi éghir we texirsiz ishtur. Buning üchün til bilidighanlarni köpeytish, xadimlarni tengshesh, menbe teqsimlesh ishlirini yaxshi orunlashqa toghra kélidu" dégen.

2017-Yil tramp hökümiti mezgilide, amérika merkiziy axbarat idarisi shimaliy koriyening yadro tehditige taqabil turush üchün "Shimaliy koriye ishliri merkizi" qurghan bolup, eyni chaghda bu heqte bérilgen bayanattimu oxshashla "Merkiziy axbarat idarisining shimaliy koriyege munasiwetlik xizmetlirige toluq yétekchilik qilish" otturigha qoyulghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet