ئامېرىكا ئەدلىيە مىنىستىرلىقىنىڭ جاكارلىشىچە، ما يۈچىڭ ۋە ئۇنىڭ ئىسمى ئاشكارىلانمىغان بىر تۇغقىنى بىردەك ئامېرىكا مەركىزىي ئىستىخبارات ئىدارىسى (CIA) نىڭ سابىق خىزمەتچىلىرى بولۇپ، ئۇلار ئايرىم-ئايرىم ھالدا خوڭكوڭ ۋە شاڭخەيدە تۇغۇلغان ھەمدە كېيىنچە ئامېرىكا پۇقرالىقىغا ئۆتكەن ئىكەن. ما يۈچىڭ 1982-يىلدىن 1989-يىلغىچە، ئۇنىڭ تۇغقىنى 1969-يىلدىن 1983-يىلغىچە CIA دا خىزمەت قىلغان.
CIA نىڭ خىزمەتچىسى بولۇش سۈپىتى بىلەن ھەر ئىككىسىنىڭ CIA نىڭ سەزگۈر ۋە مەخپىي ئۇچۇرلىرىنى كۆرۈش سالاھىيىتى بار بولۇپ، ئۇلار يەنە بۇ ئۇچۇرلارنىڭ مۇتلەق مەخپىيەتلىكىنى قوغداش ھەققىدىكى مەسئۇلىيەت ھۆججىتىگىمۇ ئىمزا قويغان. ئەمما ما يۈچىڭ 2001-يىلى 3-ئايدا، يەنى CIA دا ئىشلىمىگەن مەزگىلىدە شاڭخەي دۆلەت بىخەتەرلىك ئىدارىسى (SSSB) ئىستىخبارات خادىملىرىنىڭ تەكلىپى بىلەن ئۆزىنىڭ تۇغقىنىنى بۇ ئىدارىنىڭ خادىمى بىلەن كۆرۈشۈشكە ماقۇل كەلتۈرگەن. نەتىجىدە ئۇنىڭ تۇغقىنى خىتاي ئىستىخبارات خادىمى بىلەن خوڭكوڭدىكى بىر مېھمانخانىدا ئۇچرىشىپ ئۇنى ئامېرىكانىڭ زور مىقداردىكى دۆلەت مۇداپىئە ئۇچۇرلىرى بىلەن تەمىنلىگەن. بۇنىڭ بەدىلىگە ئۇ 50 مىڭ دوللار پۇل ئالغان. ئۇلار يەنە بۇ خادىم بىلەن داۋاملىق ھەمكارلىشىشقا قوشۇلغان.
2003-يىلى 3-ئايدا ما يۈچىڭ ھاۋايدا تۇرغان مەزگىلدە ئامېرىكا فېدېراتسىيە تەكشۈرۈش ئىدارىسى (FBI) نىڭ ھونولۇلۇ بازا ئىشخانىسىدا توختاملىق تەرجىمان بولۇشقا ئىلتىماس قىلغان. ئەينى چاغدا ئامېرىكا فېدېراتسىيە تەكشۈرۈش ئىدارىسى ما يۈچىڭنىڭ خىتاي ئىستىخبارات ئورگانلىرى بىلەن بولغان ئالاقىسىنى بىلگەن بولسىمۇ ئۇنى ئىز قوغلاپ تەكشۈرۈش پىلانىنىڭ بىر قىسمى سۈپىتىدە ئىشقا قوبۇل قىلغان ۋە بۇ ئارقىلىق ئۇنىڭ پائالىيىتىنى ۋە خىتاي بىلەن بولغان ئالاقىسىنى تەكشۈرگەن. نەتىجىدە ما يۈچىڭ 2004-يىلى 8-ئايدىن 2012-يىلى 10-ئايغىچە FBI دا ئىشلىگەن.
مايۈچىڭ بۇ جەرياندا يەنى، 2006-يىلى 2-ئايدا، ئۆزىنىڭ تۇغقىنىنى شاڭخەي ئىستىخبارات خادىملىرى تەلەپ قىلغان ئامېرىكالىق ئىككى شەخسنىڭ كىملىك مەلۇماتلىرىنى تەمىنلەپ بېرىشكە قايىل قىلغان. بۇ شەخسلەرنىڭ سالاھىيىتى ئامېرىكانىڭ دۆلەت مۇداپىئە ئۇچۇرى بولۇپ ھېسابلىنىدىكەن. ئۇ ئۆزىنىڭ يۇقىرىدىكى ئۇچۇرنى يەتكۈزۈشنىڭ ئامېرىكانىڭ خەۋپسىزلىكى ئۈچۈن زىيانلىقلىقىنى بىلىپ تۇرۇپ قىلغانلىقىنى ئىقرار قىلغان. ئۇ 2020-يىلى قولغا ئېلىنغان ئىكەن. ئۇنىڭ سوت ھۆكمى 2024-يىلى 9-ئايدا ئېلان قىلىنىدىكەن.
بۇندىن سىرت، بۈگۈن ئامېرىكا دائىرىلىرى يەنە 35 ياشلىق ۋاڭ يۈنخې ئىسىملىك خىتاينى سىنگاپوردا قولغا چۈشۈرگەن بولۇپ، ئۇ تور جىنايىتى بىلەن شۇغۇللىنىش ئارقىلىق ئامېرىكا ھۆكۈمىتىگە ئائىت نەچچە مىليارد دوللار پۇلنى ئالداپ ئېلىۋالغان ئىكەن.