Xitayning daxu'a téxnologiye shirkiti Uyghur élidin chékinip chiqqanliqini élan qilghan

Xitayning amérika hökümiti teripidin Uyghurlarni basturushqa ishtirak qilish bilen eyiblinip jazalan'ghan daxu'a téxnologiye shirkiti, Uyghur élidiki téxnika höddigerlik türlirige xatime bergenlikini élan qilghan. Roytérs agéntliqining bildürüshiche, daxu'a shirkiti 23-dékabir aksiye baziri uqturushida, bu shirket we uning tarmaq karxanilirining Uyghur élidiki yerlik hökümetler bilen imzalighan besh téxnika hemkarliq türini bikar qilish yaki uningdin chékinip chiqishqa kélishkenlikini élan qilghan. Daxu'a shirkiti yéqinqi bir hepte ichide xitayning dangliq téxnika karxanisi-xeykang shirkitidin kéyin, Uyghur élidiki hemkarliq türlirige xatime bergenlikini élan qilghan 2-shirkitidur. Xeykang shirkiti bilen daxu'a téxnologiye shirkitining her ikkilisi 2019-yili amérika hökümiti teripidin xitayning Uyghur élidiki yuqiri téxnikiliq basturush heriketlirige yardem bérish sewebidin qara tizimlikke kirgüzülgenidi.

Roytérs agéntliqining qeyt qilishiche, daxu'a shirkiti aksiye bazirida élan qilghan uqturushida, bu shirketning 2016-we 2017-yilliri alghan bezi türlerning buningdin burun axirlashturulghanliqi, lékin bir qisim türlerning hazirghiche dawamliship kelgenlikini bildürgen. Nöwette, daxu'a shirkitining Uyghur élidiki yerlik hökümetler bilen bolghan hemkarliq türlirini axirlashturushigha qandaq amillarning seweb bolghanliqi melum emes. Bu shirket özining néme üchün bu rayondin chékinip chiqmaqchi bolghanliqigha héchqandaq chüshenche bermigen. Xeykang shirkiti buningdin bir hepte awwal Uyghur élidin chékinip chiqidighanliqini élan qilghandimu, buning sewebige chüshenche bermigenidi. Amérika hökümiti 2019-yili daxu'a bilen shirkiti bilen xitayning qalghan yette téxnika shirkitini özining soda qara tizimlikige kirgüzüp, bu shirketlerning Uyghur we bashqa musulman az sanliq milletlirige qarita “Basturush hem yuqiri téxnikiliq nazaret” élip bérilishigha yardemleshkenlikini ilgiri sürgen. Emma eyni waqitta daxu'a shirkiti amérika hökümitining qararini “Pakit asasi yoq” dep ret qilghan.