Xitay hökümet taratquliri obamaning dalay lama bilen körüshkenlikige küchlük inkas qayturghan

Igilinishiche, 16-iyundin buyan xitay hökümet taratquliri amérika prézidénti obamaning aqsarayda tibetlerning rohaniy dahiysi dalay lama bilen körüshkenlikige küchlük inkas qayturghan.

Xelq torining ilgiri sürüshiche, 15-iyun küni amérika prézidénti obama dalay lamani aqsarayda kütüwalghandin kéyin, xitay hökümet taratqulirida “Dalay lama ‛qarta öyi‚ din chiqalmidi”, “Washin'gtonda bir meydan siyasiy oyun qoyuldi” qatarliq xewer we obzorlar élan qilin'ghan.

Bu heqtiki xitay hökümet xewerliride mundaq déyilgen: “Bu, obamaning wezipe ötesh mezgilide dalayni tötinchi qétim qobul qilishi. Bulturqi aqsarayning ‛nashtiliq du'a-tilawet yighilishi‚ da körüshkinini qoshup hésablighanda, ikkiylen jem'iy besh qétim körüshken bolup, bil kilinton yaratqan amérika prézidéntining dalayni alte qétim kütüwélish rékortigha tengleshken. Biraq, junggoluqlarning qarishiche, bundaq rékort unche shereplik emes.”

Xewerde yene mundaq déyilgen: “Dalayning amérikigha pat-pat ziyaretke kélishide meyli qandaq bayraqni kötürgen, qandaq niqablan'ghan bolushidin qet'iynezer, uning peqet birla siyasiy meqsiti bar. U bolsimu tibet mesilisini xelq'aralashturush we junggogha qarshi bölgünchilik herikitini kücheytishtin ibaret, xalas.”

Xewerde yene amérikigha hujum qilip mundaq déyilgen: “Amérika prézidéntlirining dalay lamani pat-pat qobul qilishi, meyli qandaq ‛töwen muqam‚ yaki ‛gheyriy resmiy körüshüsh‚ bolsun we yaki ‛siyasiyni tilgha almay peqetla din we medeniyet üstide söhbetlishish‚ bolsun, tüp négizidin alghanda, amérika dalay lamani bir siyasiy shahmat qiliwatidu, xalas.”

Közetküchiler, gerche xitay hökümet taratquliri bu heqtiki inkaslirida obamaning dalay lama bilen körüshkenlikige mensitmigendek bir muqamni ipade qilishqa tirishqan bolsimu, lékin ishletken söz-ibariliride özlirining “Qorsaq aghriqi” ni chandurup qoydi, dep qarimaqta.