Dangliq artist mya farrow Uyghurlarni hémaye qilidighanliqini bildürdi

Xitay hökümitining Uyghur diyaridiki qirghinchiliqi barghanséri köp sahege biliniwatqan bolup, awam puqralarning “Insaniyetke qarshi jinayet” dep qariliwatqan bu qilmishlarni eyiblesh sépi yéqindin buyan tedriji shekillinishke bashlidi. Waskétbol sahesidiki bir qisim cholpanlardin kéyin, holliwudning dunyagha dangliq kona artisi, shuningdek köpchilikke tonulghan pa'aliyetchi mya farrow xanim 23-küni özining tiwéttér bétide bayanat élan qilip: “Uyghurlarni qirghin qiliwatqan xitaydek bir dölet qandaqmu olimpik musabiqisige sahibxan bolalisun?” dégen.

Amérika bashchiliqidiki bir qisim gherb döletliri xitay hökümitining Uyghurlarni qirghin qilishidek ré'alliqqa qarshi bir qatar jaza tedbirlirini élan qilghandin kéyin, xelq'arada 2022-yilining béshida béyjingda ötküzilidighan qishliq olimpik musabiqisini bayqut qilish, shu arqiliq xitay hökümitining qebih jinayetlirini yene bir qétim jazalash chuqanliri kötürülgen idi. Xelq'arada zor hörmetke ige mya farrow xanimning bu sepke qoshulushi hemde Uyghurlarni hémaye qilishi, muhajirettiki Uyghurlarni we Uyghurlarni qollighuchi her sahe kishilirini bekmu söyündürdi.

Melum bolushiche, bu yil 76 yashqa kirgen mya farrow xanim 1960-yilliri holliwud filimliride rol élishni bashlighan bolup, hazirghiche 50 nechche filimde muhim rollarni alghan. U yene rol élishtiki özgiche talanti bilen holliwudning köpligen aliy mukapatlirigha érishken iken. Kéyinche bolsa birleshken döletler teshkilatining “Ézgü tilek elchisi” bolup sudan, ottura afriqa qatarliq jaylardiki qirghinchiliq we ichkiy urush mesililirini tinchliq bilen hel qilishqa töhpe qoshqan. 2008-Yili “Dewr” zhurnili uni “Dunyadiki eng zor tesirge ige shexslerning biri” dep élan qilghan iken.