Dérin baylérning “Térrorluq kapitalizmi: Uyghurlarning xitay shehiride mülüksiz qélishi we erkeklik” namliq kitabi neshrdin chaqqan

Amérikaliq Uyghurshunash, saymén fréyzér uniwérsitétining yardemchi proféssori dérin baylérning “Térrorluq kapitalizmi: Uyghurlarning xitay shehiride mülüksiz qélishi we erkeklik” namliq kitabi amérikaning dük uniwérsitéti neshriyati teripidin neshr qilin'ghan.

Melum bolushiche, darrén baylér kitabida xitayning Uyghurlarni qandaq qilip hazirqi zaman mustemlikisige aylandurghanliqini neziriyeleshtürgen. U, xitayning bir milyondin artuq Uyghurni atalmish “Qayta terbiyelesh lagérliri” da tutup turushi, uning Uyghur zéminidiki bayliqni qézish jeryanining bir qismi ikenlikini tekitlep, uning bu herikitini “Térrorluq kapitalizmi” dep körsetken.

U yene ürümchide neq meydan étnografiyelik tekshürüshi élip bérip, döletning “Xitay” medeniyet qimmet qarishini yolgha qoyushi we xitay köchmenler éqimining Uyghurlarni mülüksiz qaldurushi we sheherdin qoghlap chiqirishigha qandaq töhpe qoshqanliqlirini yorutup bergen. Dérin baylér kitabida yene dölet zorawanliqining asasliq nishani bolghan Uyghur yashlirining kechürmishlirige, ularning jinsiy, étnik we iqtisadiy zorawanliqtin özini qoghdash üchün erkeklik we dostluqni qandaq tereqqiy qilduridighanliqigha alahide diqqet qilghan.

Shundaqla yene Uyghurlarni mustemlike qilishning siyasiy, iqtisadiy izlirini tekshürüp, xitay dölet kapitalizmining Uyghurlargha qarita mustemlikichilik bilen mustemlike munasiwiti berpa qilghanliqini körsetken. Melum bolushiche, uning “Térrorluq kapitalizmi: Uyghurlarning xitay shehiride mülüksiz qélishi we erkeklik” namliq bu kitabi bu yil 12-ayda resmiy tarqitilidiken.