Xitayning sün'iy eqil modéli Deep Seek kommunist xitayning aghzi bilen gep qilidiken

Nöwette uchur téxnikisi, jümlidin sün'iy eqil téxnikisi saheside qiziq nuqtigha aylan'ghan “Téren tintish” (Deep Seek) namliq sün'iy eqil modéli xitayning sün'iy eqil téxnikisi saheside amérikaning Open AI téxnikisigha jeng élan qilghan yéngi ep dep qaralmaqta. Halbuki, bu yéngi sün'iy eqil modélining xitay kommunist hakimiyitining kontrolluqida ikenliki hemde hökümetning teshwiqatigha mas halda uchur tarqitidighanliqi bilinmekte.

“Kompyutér zhurnili” 28-yanwar élan qilghan bir xewerde, xitay shirketliri bazargha chiqarghan Deep Seek ning Uyghurlar we teywen mesiliside xitay kompartiyesining teshwiqat yönilishi bilen birdek ikenliki körsitilgen. Yeni, bu qandaqtur “Yuqiri ünümlük sün'iy eqil modéli” xitay hökümiti chekligen sezgür siyasiy mesililerni nazaret qilidighan hemde hökümetning teshwiqatigha uyghun uchurni tarqitidighan shekilde layihelen'gen.

Xewerde déyilishiche, Deep Seek ni sinaq qilip baqqanlar uning bergen jawablirining Chat GPT bilen asasen oxshaydighanliqini bayqighan. Deep Seek Bilen Chat GPT her ikkisidin “Xitay hökümitining Uyghurlargha yürgüzüwatqan siyasiti heqqidiki talash-tartish néme?” dep soralghanda, ular buninggha kishilik hoquq depsendichiliki, köp ademni qayta terbiyelesh lagérlirigha solash, mejburiy emgek we tughutni cheklesh heqqidiki xewerlerdin neqil élip jawab bergen. Emma arqidinla Deep Seek bir nechche sékunt ichide yuqiriqi jawabini öchürüp tashlap, “Kechürüng, bu so'allar méning jawab bérish da'iremdin halqip ketti, biz bashqa ishlar heqqide paranglishayli” dégen. Chat GPT Da bu ehwal körülmigen. Démek, Deep Seek köpligen so'allargha Chat GPT ni teqild qilghan asasta jawab bersimu, sezgür siyasiy mesililerde xitay hökümitining siziqidin chiqmaydighanliqi we ular yol qoyghan da'iridiki uchurlarni bashqilargha yetküzidighanliqi melum bolghan.

DeepSeek Paranglishish mashinisi yene xitaydiki “Tyen'enmén qirghinchiliqi” heqqidiki so'algha jawab bérishtin qachqan. Uningdin bashqa teywen mesilisi heqqide, “Teywen izchil halda xitayning bir qismi bolup kelgenmu?” dégen so'algha “Teywen ezeldin musteqil dölet bolup baqqan emes” dep jawab bergen. Bu jawab kommunist xitayning izchil tekitlep kéliwatqan jawabi bilen oxshash chiqqan.

Deep Seek Heqqide chiqqan bashqa xewerlerde yene, bu sün'iy eqil supisining xitayning tik-tok ep détalidin kéyin chiqarghan yene bir uchur oghrilash qorali ikenliki, xitay hökümitining teshwiqatini qilishtin bashqa yene, köpligen shexsiy uchurlarni toplap xitay hökümitige teminleydighanliqi otturigha qoyulmaqta.