"Diplomat" zhurnili: "Xitay hazir ottura sherq döletlirige yaxshichaq bolushqa tirishmaqta"

Muxbirimiz jewlan
2021-05-05
Share

Gherb döletlirining Uyghurlar mesilisi toghruluq xitaygha bésim ishlitishi we jaza yürgüzüshige egiship, xitay yene musulmanlar dunyasining qollishigha érishishke tirishmaqta iken. 5-May küni "Diplomat" zhurnili torida élan qilin'ghan bir maqalide xitay hökümitining yéqinqi aylardin buyan diplomatiye we teshwiqat wasitiliridin toluq paydilinip, musulmanlar dunyasi, jümlidin ottura sherq döletliri bilen bolghan munasiwet we yéqinliqni dawamliq kücheytiwatqanliqi otturigha qoyulghan.

Maqalide körsitilishiche, xitay yer shari téliwiziye qanili pakistan, pelestin we suriyening xitayda turushluq elchilirini ziyaret qilip, ularning tili arqiliq Uyghur rayonidiki weziyetni xelq'aragha, bolupmu musulmanlar dunyasigha perdazlap körsitishke urun'ghan.

Xitay hökümiti ötken yil 6-ayda ereb elliri ittipaqigha eza döletler bilen "Omman xitabnamisi" imzalap, radikal islamizmni yoqitidighanliqini élan qilghan bolup, emeliyette shu bahanide Uyghur diyaridiki musulmanlarni yoqitish üchün "Ijazet" alghanidi. Bu yil 4-ayning 1-küni xitay tashqi ishlar ministiri wang yi se'udi erebistan, türkiye, iran, ereb birleshme xelipiliki, omman, behreyin qatarliq döletlerni ziyaret qilip, ularning xitay hökümitining "Shinjangdiki esebiy küchlerge zerbe bérishi" ni qollighanliqigha alahide rehmet éytqan.

Maqalide körsitilishiche, xitay hökümiti ereb-islam elliridiki pikir éqimining Uyghur weziyitige tesir körsitishidin izchil endishe qilip kéliwatqan bolup, gherb ellirining xitaygha bésim qilishi we jaza yürgüzüshi bilen teng musulmanlar dunyasidimu xitaygha qarita eyiblesh sadalirining kötürülüshidin ensirigen. Emma musulmanlar dunyasi xitayning puli we köz boyamchiliqigha aldiniwatqan bolghachqa, xitayning dawamliq jinayet ötküzüshige süküt qilmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet