Amérika mu'awin prézidénti pens amérika xelq'ara diniy erkinlik komitétining mes'ullirini qobul qilip, Uyghur mesilisini muzakire qilghan

Muxbirimiz erkin
2019-05-13
Élxet
Pikir
Share
Print

Amérikaning mu'awin prézidénti mayk pens 10‏-may küni amérika xelq'ara diniy erkinlik komitétining mes'ullirini qobul qilip, Uyghur we rohin'ga musulmanlirining mesilisini muzakire qilghan.

Muzakirige amérika prézidéntining dölet xewpsizlik meslihetchisi, bash elchi jon baltonmu qatnashqan. Mu'awin prézidént pens 10‏-may küni twétirda élan qilghan uchurida, diniy erkinlik komitétining rohin'ga we Uyghur musulmanlirining teqdirini alahide eskertkenlikige rehmet éytip, tramp hökümitining her waqit diniy erkinlik üchün tik turidighanliqini bildürgen.

Amérika xelq'ara diniy erkinlik komitétining shu küni élan qilghan xewiride qeyt qilinishiche, yighinda mezkur komitétning yéqinda élan qilin'ghan 2019‏-yilliq doklati we uningda otturigha qoyulghan teklip-pikirler muzakire qilin'ghan. Yighin ötküzülgen del shu küni amérika xelq'ara diniy erkinlik komitéti bayanat élan qilip, hökümetning Uyghur mesilisini amérika-xitay soda söhbiti bilen birleshtürüshini telep qilghan. Bayanatta, "Xitay hökümitining shinjangdiki Uyghur we bashqa musulmanlardin 3 milyondek kishini tutqun qilghanliqi" tekitlinip, "Xitaydiki milyonlighan xelqning hayati we erkinliki öz hökümitining hujumigha uchrawatqan ehwalda biz diniy erkinlik we kishilik hoquqni uning küntertipige élip kirishimiz kérek" déyilgen. Mezkur komitét buning sel aldida élan qilghan yilliq doklatida amérika hökümitige xitayni "Diniy erkinliki alahide közitilidighan döletler tizimliki" ge kirgüzüshni, chén chü'en'go qatarliq xitay emeldarlirigha jaza qoyushni teklip qilghan idi. Lékin, xelq'ara diniy erkinlik komitétining yighin heqqidiki xewiride mayk pensning yuqiriqi teklipke qandaq inkas qayturghanliqi tilgha élinmighan.

Toluq bet