Америка дини әркинлики комитетиниң икки әзаси һөкүмәтни чен чүәнгони җазалашқа чақирди

Хитай һөкүмитиниң уйғурларниң дини вә миллий һоқуқлирини еғир дәриҗидә дәпсәндә қиливатқан чен чүәнго қатарлиқ әмәлдарлирини җазалаш һәққидики тәләпләр күнсайин күчәймәктә.

Америка дөләт мәҗлисигә қарашлиқ “хәлқара диний етиқад әркинлики комитети” ниң әзалиридин тензин дорҗи вә гәрий бавер америкадики “дөләт мәҗлиси” тор журнилида мақалә елан қилип, америка һөкүмитини дәрһал хитайниң уйғур аптоном районидики коммунистик партийә секретари чен чүәнгони “магнетиски қануни” арқилиқ җазалашқа чақирған.

Улар мақалисидә, уйғур елидә йүз бериватқан зулумға қарши америка трамп һөкүмити наһайити очуқ бир позитсийә билдүргән болсиму, лекин иқтисад вә бихәтәрлик амиллирини көздә тутуп, хитайға қарши кәскин бир тәдбир алмайватқанлиқини, әмма дини әркинлик вә кишилик һоқуқни муһим орунға қоюватқан америка һөкүмити үчүн буниң баш тартип болмайдиған мәҗбурийәт икәнликини әскәрткән.

Улар, трамп һөкүмити һеч болмиғанда уйғур елидики мусулманларниң шундақла тибәттики мәзгилидә тибәтләрниң дини һоқуқлирини еғир дәриҗидә дәпсәндә қилишта баш рол ойниған чен чүәнгони “магнетиски қануни” арқилиқ җазалиши вә бу арқилиқ американиң зулумға сүкүт қилмайдиғанлиқидин сигнал бериши керәкликини билдүргән.

Мақалидә, уйғур елидә нөвәттә давам қиливатқан еғир зулумға янтаяқ болуватқан хитай һөкүмәт әмәлдарлирини җазалаш-американиң әхлақий бурчи икәнлики әскәртилгән.