Amérika dini erkinliki komitétining ikki ezasi hökümetni chén chüen'goni jazalashqa chaqirdi

Xitay hökümitining Uyghurlarning dini we milliy hoquqlirini éghir derijide depsende qiliwatqan chén chüen'go qatarliq emeldarlirini jazalash heqqidiki telepler künsayin kücheymekte.

Amérika dölet mejlisige qarashliq “Xelq'ara diniy étiqad erkinliki komitéti” ning ezaliridin ténzin dorji we geriy bawér amérikadiki “Dölet mejlisi” tor zhurnilida maqale élan qilip, amérika hökümitini derhal xitayning Uyghur aptonom rayonidiki kommunistik partiye sékrétari chén chüen'goni “Magnétiski qanuni” arqiliq jazalashqa chaqirghan.

Ular maqaliside, Uyghur élide yüz bériwatqan zulumgha qarshi amérika tramp hökümiti nahayiti ochuq bir pozitsiye bildürgen bolsimu, lékin iqtisad we bixeterlik amillirini közde tutup, xitaygha qarshi keskin bir tedbir almaywatqanliqini, emma dini erkinlik we kishilik hoquqni muhim orun'gha qoyuwatqan amérika hökümiti üchün buning bash tartip bolmaydighan mejburiyet ikenlikini eskertken.

Ular, tramp hökümiti héch bolmighanda Uyghur élidiki musulmanlarning shundaqla tibettiki mezgilide tibetlerning dini hoquqlirini éghir derijide depsende qilishta bash rol oynighan chén chüen'goni “Magnétiski qanuni” arqiliq jazalishi we bu arqiliq amérikaning zulumgha süküt qilmaydighanliqidin signal bérishi kéreklikini bildürgen.

Maqalide, Uyghur élide nöwette dawam qiliwatqan éghir zulumgha yantayaq boluwatqan xitay hökümet emeldarlirini jazalash-amérikaning exlaqiy burchi ikenliki eskertilgen.