Қарақаш наһийисидә мәсчит дәрвазисиниң темидики нәқишләр “рухсәтсиз ясалған” дәп сувиветилгән

Йеқинда хотәнниң қарақаш наһийисидә бир мәсчитниң темиға оюлған нәқишләр “рухсәтсиз ясалған” дегән сәвәб билән сувиветилгән. Уйғурбиз ториниң хәвәр қилишичә, мәзкур наһийидики бу мәсчит дәрвазиси йеқинда ремонт қилинип, оттура асия бинакарлиқ сәнити бойичә көркәм қилип нәқишләнгән.

Шу қатарда мәсчит дәрвазисиниң оң тәрипидики там вә түврүкләр ремонт қилинип, нәқиш оюлған. Лекин йәрлик даириләр дәрвазини ремонт қилишқа рухсәт қилинғанлиқи, дәрвазиниң оң тәрипидики 12 метирлиқ там вә түврүкләрниң “рухсәтсиз”ремонт қилинғанлиқини илгири сүрүп, там вә түврүктики нәқишләрни лай билән сувивәткән. Мәзкур наһийидә йәнә, мәсчитләрниң қуббисидики ай юлтузлар пүтүнләй елип ташланған.

Уйғурбиз ториниң хәвиридә, йәрлик даириләр ай юлтузни бөлгүнчиликниң символи дәп қарап елип ташлиғанлиқини илгири сүргән. Хитай һөкүмити уйғур елидә мәсчит қатарлиқ мусулманларниң диний ибадәт орунлирини қаттиқ контрол қилип кәлди. Йеңи мәсчитләрни селишни чәкләпла қалмай, кона мәсчитләрни ремонт қилишқиму чәклимә қоюп кәлгән. Хәлқара диний әркинлик органлири хитайни агаһландуруп, униң бу сиясити техиму қаттиқ қаршилиқларни кәлтүрүп чиқиридиғанлиқини билдүргән.