Amérika tashqi ishlar ministirliqi diniy erkinlik bayanati élan qildi

Amérika tashqi ishlar ministiri antoni bilinkén 17-noyabir küni diniy erkinlikning tebiri heqqidiki bayanatini élan qildi hemde amérika hökümitining diniy erkinlik heqlirini himaye qilish meydanining héchqachan özgermeydighanliqini jakarlidi.

Amérika tashqi ishlar ministirliqining tor bétide élan qilin'ghan mezkur bayanatta bir qisim hökümetlerning puqralarni diniy étiqadi seweblik qolgha élish we türmilerge qamash, hetta ölümge mehkum qilishtek qilmishlar bilen shughulliniwatqanliqi keskin eyiblendi. Shu qatarda xitay, birma qatarliq bir qisim “Alahide teshwishlik döletler” ning sistémiliq halda diniy étiqad ziyankeshlikini dawam qilduruwatqanliqi körsitilip “Biz bu xildiki diniy étiqadni bahane qilip xelqni basturushtek qilmishqa hergizmu süküt qilmaymiz” déyilidu.

Uyghur diyaridiki zor tutqun we lagér sistémisi heqqidiki sansizlighan uchurlar del xitay hökümitining Uyghurlardiki diniy étiqadni “Térrorluq we ashqunluq” qa baghlap, bularni Uyghurlarni basturush hemde mejburiy assimilyatsiye qilishtiki bahane qiliwalghanliqini köp qétim körsetkenidi. Shu sewebtinmu amérika hökümitining sabiq tashqi ishlar ministiri mayk pompéyo Uyghur diyaridiki siyasiy basturushni “Irqiy qirghinchiliq” dep élan qilghan, hazirqi tashqi ishlar ministiri antoni bilinkénmu özining bu qararni toluq étirap qilidighanliqini bildürgenidi.