Uyghur rayonidiki "Diniy zatlar" amérikaning "Uyghur kishilik hoquq qanun layihesi" ge qarshi chiqti

Muxbirimiz erkin
2019-12-09
Élxet
Pikir
Share
Print

Xitay hökümiti Uyghur rayonidiki her derijilik idare-jem'iyet we taratqularni seperwer qilip, amérika awam palatasining 3‏-dékabir küni maqullan'ghan "Uyghur kishilik hoquq qanun layihesi" ge qarshi teshwiqat hujumini dawamlashturmaqta.

Melum bolushiche, nöwette bu teshwiqat hujumigha rayondiki "Diniy zatlar" qétilghan. 9‏-Dékabir küni "Shinjang islam jem'iyiti" ning re'isi, "Shinjang islam instituti" ning mudiri abduréqip tuniyaz, "Shinjang islam jem'iyiti" ning mu'awin re'isi, ürümchi aq meschitning imami abdushükür rehmitulla, aqsuning onsu nahiyesige qarashliq töwenki jam meschitining imami exmet osman, yeken altunluq meschitining xatipi abduweli ablimit, toquztara nahiyelik islam jem'iyitining mu'awin bashliqi, jirghilang meschitining imami esbidin semet, qaraqash nahiye baziridiki chinibagh meschitining imami memet memtimin qatarliqlar bayanat élan qilip, amérikani tenqidligen.

Ularning ilgiri sürüshiche, amérika awam palatasi "Uyghur kishilik hoquq qanun layihesi" ni maqullap, "Xelq'ara munasiwetler qa'idisige xilapliq qilghan we xitayning ichki ishlirigha qopalliq bilen arilashmaqta" iken. Abduréqip tuniyaz shinxu'a agéntliqigha bergen bayanatida lagérlarni aqlap, "Shinjang qanun'gha asasen kespiy terbiyelesh merkezlirini qurup, diniy esebiylik idiyesidin yuqumlinishning aldini aldi" dégen. Abdushükür rehmitulla bolsa "Shinjang mesilisi" ning diniy mesile, milliy mesile yaki kishilik hoquq mesilisi emeslikini, buning "Bir zorawan térrorluqqa we bölgünchilikke qarshi turush mesilisi" ikenlikini ilgiri sürgen. Yeken altunluq meschitining xatipi abduweli ablimitning ilgiri sürüshiche, "Kespiy terbiyelesh merkezliri" namidiki bu orunlar "Yataqliq mektep bolup, oqughuchilar ruxset sorap öyige qaytalaydiken, shundaqla téléfonda sözlisheleydiken".

Nöwette, yuqiriqi "Diniy zatlar" ning bayanatlirida xitay hökümiti bilen oxshash söz ibarilerni ishlitishi közetküchilerning diqqitini qozghimaqta. Amérika awam palatasining 3‏-dékabir maqullan'ghan "Uyghur kishilik hoquq qanun layihesi" de 2 milyondek musulmanni lagérlargha qamap, Uyghur we bashqa musulmanlarni xorlawatqan chén chü'en'go bashchiliqidiki xitay emeldarlirini jawabkarliqqa tartish telep qilin'ghanidi.

Toluq bet