Хитай секретар чен чүәнго уйғур елидә динни хитайчилаштурушни күчәйтишни тәкитлигән

Мухбиримиз ирадә
2019-04-02
Елхәт
Пикир
Share
Принт

Уйғур аптоном райониниң партком секретари чен чүәнго уйғур елидә диний хизмәтләрни башқурушни күчәйтип, динни хитайчилаштуруш пиланида чиң турушни тәкитлигән.

Хитайниң тәңритағ тори тарқатқан хәвәргә қариғанда, уйғур аптоном район даирилири 31-март күни уйғур елидики аталмиш «вәтәнпәрвәр дини затлар» сөһбәт йиғини уюштурған болуп, сөһбәткә қатнашқан чен чүәнго «шинҗаңда мәңгүлүк әминликни бәрпа қилип, җуңго чүшиниң әмәлгә ешишиға капаләтлик қилиш үчүн партийиниң диний ишлар сияситини қаттиқ әмәлийләштүрүшни, дини паалийәтләр вә дини хизмәтләргә қаритилған башқурушни күчәйтиш» ни тәкитлигән. У шундақла сөзидә «динни хитайчилаштуруш пиланини изчил омумлаштуруп, динни сотсиялистик идийәгә маслаштуруш» ни тәкитлигән. 

Кишилик һоқуқ органлириниң қаришичә, хитай һөкүмити уйғурларниң намаз оқуш, роза тутуш, диний китабларни сақлаш, сақал қоюш, яғлиқ чигиш қатарлиқ нормал диний паалийәтләрниму «диний ашқунлуқ» қатарида һесаблап җазалимақтикән. юқиридикиләр уйғур елидики кишиләрниң лагерға солинишиниң асаслиқ сәвәби болуп қалған иди. 

Мәлум болушичә, мәзкур «вәтәнпәрвәр дини затлар сөһбәт йиғини» ға уйғур аптоном райониниң рәһбәрлиридин шөһрәт закир, ли пеңшин вә йеңидин уйғур аптоном районлуқ сиясий-қанун комитетиниң секретари җу хәйлунниң вәзиписини өткүзүвалған ваң җүнҗең қатарлиқлар толуқ қатнашқан. Чәтәлләрдики уйғур көзәткүчиләр буни хитай һөкүмитиниң уйғур елидә нөвәттә «террорлуқ» вә «радикаллиқ» билән күрәш қилиш дегән нам астида уйғурларниң миллий вә дини кимликини йоқ қилишқа урунуштин ибарәт сияситини давамлиқ чиңитидиғанлиқиниң ипадиси, дәп қаримақта.

Бу йил 1-айда хитайниң «йәр шари вақти гезити» бир парчә хәвәр елан қилип, хитай һөкүмәт даирилириниң хитайдики сәккиз ислам җәмийитиниң вәкиллири билән көрүшүп улар билән «исламни сотсиялизмға маслаштуруш вә динниң хитайлаштурулушида елинидиған тәдбирләр» һәққидә пикир бирликигә кәлгәнликини билдүргән. Бирақ униң тәпсилати елан қилинмиған иди.

Пикирләр (0)
Share
Толуқ бәт