Disnéy shirkiti pikirini özgertip, Uyghur irqiy qirghinchiliqi shahitliri bilen körüshüshke maqul bolghan

Amérikining dangliq oyun-tamasha baghchisi bolghan disnéy shirkitining mes'ulliri pikirini özgertip, Uyghur irqiy qirghinchiliqi shahitliri bilen körüshüshke maqul bolghan. “Washin'gton erkin mayaki” gézitining xewer qilishiche, mezkur gézit yéqinda disnéy shirkiti mes'ullirining Uyghur shahitliri bilen körüshüshtin yéniwalghanliqini xewer qilghandin kéyin, shirket mes'ulliri pikirini qayta özgertken. Disnéy shirkiti bu ayning bashlirida amérika awam palata ezasi jim banksqa xet yézip: “Uyghur kishilik hoquq qurulushi we amérika Uyghur jem'iyiti bilen alaqiliship, bizning alaqidar mes'ullirimiz ular bilen biwasite söhbet ötküzüshni orunlashturimiz” dep körsetken.

Awam palata ezasi jim banks, bu yil 5-ayda disnéy shirkitige xet yézip, bu shirkettin xitay kompartiyesi musulmanlargha zulum séliwatqan bir rayonda filim ishlishidin bi'aram bolghan Uyghurlar, ularning a'ile ezaliri we pa'aliyetchiler bilen körüshüshtin qachqanliqigha chüshenche bérishni telep qilghan. “Washin'gton erkin mayaki” gézitining qeyt qilishiche, disnéy shirkiti amérika dölet mejlisi amérika shirketlirining xitay bilen bolghan hemkarliqini tekshürüshke bashlighan bir waqitta pikirini özgertken. Jim banks we amérika awam palatasining xitay istratégiyelik riqabet komitétidiki bashqa ezalar nayké, adidas qatarliq dangliq shirketlerning Uyghur mejburiy emgiki we irqiy qirghinchiliqi bilen bolghan alaqisige qarita tekshürüsh bashlighanidi.

“Washin'gton erkin mayaki” gézitining éytishiche, awam palata ezasi jim banks disnéy shirkitining inkasidin ilhamlan'ghanliqi bildürüp: “Lékin buning disnéy üchün “Bir burulush nuqtisi bolidighan bolmaydighanliqini körimiz” dégen.

Disnéy shirkiti 2020-yili xitayning qedimki “Mulen” riwayiti asasida yézilghan kino sénariyesini Uyghurlargha qarita irqiy qirghinchiliq yürgüzülüwatqan Uyghur rayonida süretke élip qattiq tenqidke uchrighan. Turpandiki kino süretke élin'ghan jayda bir jaza lagérining barliqi melum bolghanidi.