Shangxey disniy shirkiti Uyghurlarni kemsitish qilmishini tekshürmekchi boldi

Shangxeydiki disniy baghchisigha qarashliq méhmanxanining Uyghurlargha öy bermeslik heqqidiki uqturushi tarqalghandin kéyin zor ghulghuligha seweb boldi. Buning bilen herqaysi axbarat wastiliri bu heqtiki ékran süritini élan qilip, buning Uyghurlargha qaritilghan kemsitish ikenlikini tekitlidi.

Roytérs agéntliqining 19-yanwardiki xewiride éytilishiche, disniy shirkiti bu mesilini estayidil tekshüridighanliqini bildürgen. Shundaqla bu xildiki melum guruppigha tewe kishilerge öy bermeslikni “Toghra emes” dep körsetken. Mezkur weqe yüz bergen eyshabaw méhmanxanisining bir xadimi bolsa roytérs agéntliqigha bu heqte söz qilip: “Saqchilar bizge Uyghurlar kelse öy bermenglar, dep buyrughan” dégen. Emma shangxey saqchi da'iriliri buni étirap qilmighan hemde ‍özlirining bu ishtin xewiri yoqluqini bildürgen.

Disniy shirkiti ötken yili “Mulen” filimi seweblik bir qétim keskin tenqidke duchar bolghanidi. Bu qétim ularning Uyghurlarni ashkara kemsitish bilen chétilip qalghanliqi yene bir zor ghulghuligha seweb boldi.