Amérika kéngesh palata ezasi josh xowliy disnéy shérkitini Uyghur élidiki zulumni “Aqlash” bilen eyiblidi

Amérika kéngesh palata ezasi josh xowléy disnéy shirkitining “Mulen” namliq filim körünüshlirini jaza lagérliri mewjut bolghan Uyghur élide süretke alghanliqini tenqid qildi.

U disnéy shirkitige bu heqte resmiy mektup yollap, ularning milyonlighan Uyghurning lagérlargha qamilip qirghinchiliqqa uchrishida biwasite rol oynighan Uyghur aptonom rayonluq we turpan sheherlik jama'et xewpsizlik organlirigha we shundaqla bu lagérlar heqqide yalghan teshwiqat tarqitish bilen shughullan'ghan xitay kompartiyesining teshwiqat organlirigha rehmet éytishini “Jinayetni aqlighanliq” dégen.

Sénator josh xowliy mektupida “Disni shirkiti 2018-yili 8-ayda ‛mulen‚ filimini ishleshke bashlighanda Uyghur élide keng kölemlik tutqun yürgüzülüwatqanliqi amérika hökümiti we musteqil organlar teripidin alliqachan jezimleshtürülgen. Biraq disnéy shirkiti bu heqiqetni körmeske sélip, filimni ishleshni dawamlashturdi,” dégen.

U mektubining axirida disnéy shirkitining néme üchün bir qisim filim körünüshlirini Uyghur élide tartishni qarar qilghanliqi, u yerdiki jama'et xewpsizlik orgini we bashqa hökümet organlirining bu filimge qandaq yardemde bolghanliqi, ikki terep arisida hélihem alaqe bar-yoqluqi qatarliq 9 xil so'algha jawab bérishni telep qilghan. So'allar ichide yene “Disnéy shirkiti xitay hökümitining Uyghur élide insan hoquqlirini depsende qiliwatqanliqini qobul qilamdu? disnéy shirkiti Uyghur élidiki zulumni we uni ijra qiliwatqan organlarni aqlash rolini ötewatqan ‛mulen‚ filimini qoyushni toxtitamdu-yoq? bu filimdin hazirghiche kirgen kirimni Uyghur élidiki zulumgha qarshi küresh qiliwatqan musteqil kishilik hoquq organlirigha i'ane qilamdu?” dégenlermu bar.