Nusret ghéni en'gliye parlaméntida disniy shirkitini eyiblidi

Disniy shirkitining ghayet zor meblegh sélishi bilen ishlen'gen “Mulen” filimi 2020-yilining bashliridin tartip xelq'araning keskin tenqidlirige duch kelgenidi. Bolupmu mezkur filim guruppisining milyonlighan Uyghurni lagérgha qamighan xitay saqchi sistémisigha teshekkür éytishi hemmila sahening könglini ghesh qilghan ishlarning biri bolghanidi.

4-Öktebir küni en'gliye parlaméntining ezasi nusret ghéni xanim parlaméntta mexsus söz qilip, disniy shirkitining bu heqtiki so'allarni sorighan parlamént komitétigha jawab bérishni ret qilghanliqini eyiblidi. Shundaqla ularning bilip turup milyonlighan Uyghurni lagérgha qamighan bir makan'gha bérip filim ishlishining emeliyette iqtisadiy menpe'ettin bashqini oylimasliqtek qilmish ikenlikini alahide tekitlidi. U sözide parlamént re'isige so'al qoyup “Biz disniy shirkitidin chirayliqche so'al sorisaq ularning en'gliyediki wekili yighin'gha kélishni we so'alimizgha jawab bérishni ret qildi. Bu ularning en'gliye parlaméntini közge ilmighanliqi emesmu?” dédi. Shuningdek disniy shirkitining en'gliye parlaménti aldida hemde jama'et aldida öz mejburiyetlirini ada qilish mesilisige qarita qandaq tedbirlerning élinidighanliqini soridi.

Parlamént re'isi bu so'allarni anglighandin kéyin disniy shirkitining bu so'allargha jezmen jawab bérish mejburiyitining barliqi'ini, shunga ularni qaytidin parlaméntqa chaqirtidighanliqini, eger bunimu ret qilsa u halda ularning bu qilmi'ish en'gliye hökümitige melum qilinidighanliqini bildürdi.