Нусрәт ғени әнглийә парламентида дисний ширкитини әйиблиди

• Мухбиримиз әзиз
  2020-11-04

Дисний ширкитиниң ғайәт зор мәбләғ селиши билән ишләнгән “мулән” филими 2020-йилиниң башлиридин тартип хәлқараниң кәскин тәнқидлиригә дуч кәлгәниди. Болупму мәзкур филим гурупписиниң милйонлиған уйғурни лагерға қамиған хитай сақчи системисиға тәшәккүр ейтиши һәммила саһәниң көңлини ғәш қилған ишларниң бири болғаниди.

4-Өктәбир күни әнглийә парламентиниң әзаси нусрәт ғени ханим парламентта мәхсус сөз қилип, дисний ширкитиниң бу һәқтики соалларни сориған парламент комитетиға җаваб беришни рәт қилғанлиқини әйиблиди. Шундақла уларниң билип туруп милйонлиған уйғурни лагерға қамиған бир маканға берип филим ишлишиниң әмәлийәттә иқтисадий мәнпәәттин башқини ойлимаслиқтәк қилмиш икәнликини алаһидә тәкитлиди. У сөзидә парламент рәисигә соал қоюп “биз дисний ширкитидин чирайлиқчә соал сорисақ уларниң әнглийәдики вәкили йиғинға келишни вә соалимизға җаваб беришни рәт қилди. Бу уларниң әнглийә парламентини көзгә илмиғанлиқи әмәсму?” деди. Шуниңдәк дисний ширкитиниң әнглийә парламенти алдида һәмдә җамаәт алдида өз мәҗбурийәтлирини ада қилиш мәсилисигә қарита қандақ тәдбирләрниң елинидиғанлиқини сориди.

Парламент рәиси бу соалларни аңлиғандин кейин дисний ширкитиниң бу соалларға җәзмән җаваб бериш мәҗбурийитиниң барлиқиини, шуңа уларни қайтидин парламентқа чақиртидиғанлиқини, әгәр буниму рәт қилса у һалда уларниң бу қилмииш әнглийә һөкүмитигә мәлум қилинидиғанлиқини билдүрди.