Америка дөләт мәҗлиси әзалири америка васкетболчилар бирләшмиси(NBA) топчилирини мәҗбурий әмгәккә четишлиқ хитай ширкәтлири билән тохтамлашмаслиққа чақирған

• Мухбиримиз җәвлан
  2021-06-02

Америка кеңәш палата әзаси җеф меркли, авам палата әзаси вә дөләт мәҗлиси хитай ишлири иҗраийә комитетиниң рәиси җәмес мәкговерн қатарлиқлар дөләтлик васкетболчилар бирләшмиси (NBPA) рәиси крис паул билән иҗраийә директори мишел робертисқа мәктуп йоллап, NBA топчилириниң хитайниң кийим-кечәк ширкити анта (Anta), ли ниң, пек (Peak) билән тохтам түзгәнликини, мәзкур ширкәтләрниң уйғур районидики мәҗбурий әмгәк билән четишлиқ икәнликини оттуриға қойған һәмдә бирләшмә рәисигә чақириқ қилип, хитайдики уйғурларға қаритилған ирқий қирғинчилиқни нәзәрдә тутуп, NBA топчилириниң юқириқи ширкәтләр билән тохтам түзмәсликигә вә түзгән тохтамни бикар қилишқа һәйдәкчилик қилишини тәләп қилған.

Мәктубта мундақ дейилгән: “биз америка васкетболчилар бирләшмиси вә униң әзалириниң шинҗаңда йүз бериватқан ирқий қирғинчилиққа болған тонушини өстүрүшини, шу мәһсулатларни етирап қилиш арқилиқ уларни ишләпчиқиришта мәҗбурий әмгәктин пайдилиниватқан ширкәтләр үчүн муһим рол ойнаватқанлиқини һес қилишини сораймиз. Бу тиришчанлиқимизниң мевә беришини, васкетболчиларниң анта, ли ниң, пек қатарлиқ ширкәтләр билән түзгән тохтамдин пайдилинип, бу ширкәтләрни шинҗаң пахтиси ишләтмәсликкә чақиришини, әгәр буниңдин нәтиҗә алалмиса у ширкәтләрниң вакаләтчиси болуш тохтамини бикар қилишини үмид қилимиз. Мәҗбурий әмгәк америкиниң қиммәт қаришиға һәм америка қануниға уйғун әмәс. NBA Топчилири пуқрави әлчиләр болуп, дуняниң һәммила йеридә мәстанилири бар. Биз уларниң бирәр мәһсулатқа вәкил болушни қарар қилишида америка васкетболчилар бирләшмисиниң қиммәт қаришини әкс әттүрүшини үмид қилимиз”.

Бу мәктупта йәнә, 10 нәччә нәпәр NBA васкитболчисиниң юқириқи ширкәтләр билән образ вәкили болуш келишими түзгәнлики, бирәйләнниң йәнә анта ширкити билән давамлиқ тохтам түзгәнлики билдүрүлгән һәмдә уларниң хитайдики бу қорқунчлуқ кишилик һоқуқ дәпсәндичиликигә шерик болмаслиқи керәклики агаһландурулған.

Нөвәттә хитайниң америкадики әлчиханиси бу мәктупқа техи инкас билдүрмигән.