Amérika dölet mejlisi ezaliri amérika waskétbolchilar birleshmisi(NBA) topchilirini mejburiy emgekke chétishliq xitay shirketliri bilen toxtamlashmasliqqa chaqirghan

• Muxbirimiz jewlan
  2021-06-02

Amérika kéngesh palata ezasi jéf mérkli, awam palata ezasi we dölet mejlisi xitay ishliri ijra'iye komitétining re'isi jemés mekgowérn qatarliqlar döletlik waskétbolchilar birleshmisi (NBPA) re'isi kris pa'ul bilen ijra'iye diréktori mishél robértisqa mektup yollap, NBA topchilirining xitayning kiyim-kéchek shirkiti anta (Anta), li ning, pék (Peak) bilen toxtam tüzgenlikini, mezkur shirketlerning Uyghur rayonidiki mejburiy emgek bilen chétishliq ikenlikini otturigha qoyghan hemde birleshme re'isige chaqiriq qilip, xitaydiki Uyghurlargha qaritilghan irqiy qirghinchiliqni nezerde tutup, NBA topchilirining yuqiriqi shirketler bilen toxtam tüzmeslikige we tüzgen toxtamni bikar qilishqa heydekchilik qilishini telep qilghan.

Mektubta mundaq déyilgen: “Biz amérika waskétbolchilar birleshmisi we uning ezalirining shinjangda yüz bériwatqan irqiy qirghinchiliqqa bolghan tonushini östürüshini, shu mehsulatlarni étirap qilish arqiliq ularni ishlepchiqirishta mejburiy emgektin paydiliniwatqan shirketler üchün muhim rol oynawatqanliqini hés qilishini soraymiz. Bu tirishchanliqimizning méwe bérishini, waskétbolchilarning anta, li ning, pék qatarliq shirketler bilen tüzgen toxtamdin paydilinip, bu shirketlerni shinjang paxtisi ishletmeslikke chaqirishini, eger buningdin netije alalmisa u shirketlerning wakaletchisi bolush toxtamini bikar qilishini ümid qilimiz. Mejburiy emgek amérikining qimmet qarishigha hem amérika qanunigha uyghun emes. NBA Topchiliri puqrawi elchiler bolup, dunyaning hemmila yéride mestaniliri bar. Biz ularning birer mehsulatqa wekil bolushni qarar qilishida amérika waskétbolchilar birleshmisining qimmet qarishini eks ettürüshini ümid qilimiz”.

Bu mektupta yene, 10 nechche neper NBA waskitbolchisining yuqiriqi shirketler bilen obraz wekili bolush kélishimi tüzgenliki, bireylenning yene anta shirkiti bilen dawamliq toxtam tüzgenliki bildürülgen hemde ularning xitaydiki bu qorqunchluq kishilik hoquq depsendichilikige shérik bolmasliqi kérekliki agahlandurulghan.

Nöwette xitayning amérikadiki elchixanisi bu mektupqa téxi inkas bildürmigen.