Америка дөләт мәҗлиси әзалири қанун лайиһәси сунуп, хоңкоң аптономийәсини сода билән бағлашни тәләп қилди

Мухбиримиз әркин
2019-06-14
Share

Хоңкоңда зор көләмлик наразилиқ намайишлириниң партлиши вә даириләрниң намайишчиларға зорлуқ күч ишлитишидин кейин америка дөләт мәҗлиси әзалири қайта қанун лайиһәси сунуп, хоңкоңда демократийә, мустәқил әдлийә вә кишилик һоқуқни қоғдашни тәләп қилған.

Қанун лайиһәсини американиң авам вә кеңәш палатасидики һәр икки партийәдин болған әзалири ортақ тәйярлиған болуп, униңда американиң хоңкоң билән болған алаһидә сода мунасивитини униң сиясий аптономийә әһвалиға бағлаш тәләп қилинған.

Хоңкоң хәлқи 9‏-июн күни бир милйон кишилик намайиш қилип, хоңкоң валийсиниң хитай чоң қуруқлуқиға "қачқунларни өткүзүп бериш қанун лайиһәси" гә қарши турған.

Намайиш 12‏-июн күни тоқунушқа айланған болуп, сақчилар намайишчиларға зорлуқ күч қолланған.

"дәвр" һәптилик журнилиниң хәвиридә билдүрүлишичә, хоңкоң кишилик һоқуқ-демократийә қанун лайиһәсидә "хоңкоңда әркинлик вә аптономийә йоқитишқа учраватқан бир вақитта америка өзиниң демократийәлик кишилик һоқуқ вә қанун билән башқурулушқа болған вәдисини қайта тәкитләйду" дейилгән. Мәзкур қанун лайиһәси америка дөләт мәҗлисиниң һәр икки палатасида "уйғур кишилик һоқуқ сиясити қанун лайиһәси" дин кейин оттуриға қоюлған хитайниң демократийә, кишилик һоқуқ мәсилисигә алақидар әң муһим қанун лайиһәси болуп һесаблиниду.

Америка уйғур кишилик һоқуқ қанун лайиһәси бу йил 1‏-айда америка авам вә кеңәш палаталирида бирла вақитта оттуриға қоюлуп, уйғурларни қоғдаш тәләп қилинғаниди. "дәвр" журнилиниң билдүрүшичә, хоңкоң демократийә қанун лайиһәсидә һәр йили хоңкоңниң аптономийә әһвалини баһалап, буниң, америка билән болған алаһидә сода мунасивитигә лайиқ яки лайиқ әмәсликини қарар қилиш тәләп қилинған. Америка авам палата әзаси җим микговерн бу һәқтә елан қилған баянатида, "биз бу қанун лайиһәсини оттуриға қойдуқ, чүнки бүгүн хоңкоңда демократийә вә әркинлик һуҗумға учримақта" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт