Хитай һөкүмити уйғур диярида йүргүзүватқан дөләт террорлуқини техиму күчәйтишкә урунмақта

Нөвәттә уйғур дияридики үч милйондин артуқ уйғур, қазақ қатарлиқ түркий милләтләр хитайниң җаза лагерлириға қамиливатқан, райондики кишилик һоқуқ вә нормал диний әркинлик қаттиқ чәклимигә учраватқан бир мәзгилдә хитай дөләтлик җ х министирлиқи уйғур дияриға мәхсус сәнәт өмики әвәтип, райондики сақчилардин “һал сориған”.

“хитай хәвәрлири” ториниң бүгүн, йәни 6-июндики видийолуқ хәвәрдин мәлум болушичә, хитай җ х министирлиқи 3-июн үрүмчи шәһәрлик җ х идарисидә “һал сораш” сәнәт кечилики өткүзгән. Хәвәрдә мәзкур кечиликниң асасий мәқсити райондики һәрқайси қатламдики сақчи хадимлириниң уйғур диярида қиливатқан “алдинқи сәп” хизмәтлирини “мәдһийәләш” вә “илһамландуруш” икәнлики тәшвиқ қилинған.

Хәвәрдә йәнә уйғур дияридики асасий қатлам сақчи хадимлириниң “қошмақ туғқан” лириниңму қатнашқанлиқи нуқтилиқ тилға елинған.

Мәзкур видийолуқ хәвәрдә сәнәт кечиликкә риясәтчилик қилған хитай җ х министирлиқиниң бир аял хадими кечилик һәққидики тәсиратини баян қилип, 2006-йилидин һазирғичә уйғур дияриға төт қетим оюн қойғили кәлгәнликини, бу қетим районниң техиму тинч вә муқим болғанлиқини йәнә бир қетим һес қилғанлиқини алаһидә ейтип өткән.

Хәвәрдә йәнә хитай җ х министирлиқиниң уйғур дияридики уйғурлар зич олтурақлашқан қәшқәр, хотән қатарлиқ шәһәрләр вә биңтүәнгә берип оюн қойидиғанлиқи, бу кечиликниң тибәт райониға қәдәр кеңийидиғанлиқи қәйт қилинған.

Нөвәттә хитай һөкүмити уйғур дияридики уйғурларни қаттиқ тәқиб астиға елип, районда дөләт террорлуқи йүргүзүватқан бир пәйттә, аталмиш “һал сораш” намидики паалийәтләрни уюштуруши шундақла буниң хитай үчүн әң сәзгүр болған тибәт районидиму өткүзүлүши диққәт қозғиди.

Көзәткүчиләр хитай һөкүмити бу қилмиши арқилиқ уйғур дияридики сақчи тармақлирини райондики бастуруш сияситини техиму күчәйтишкә илһамландуруватқанлиқини тәхмин қилмақта.