Xitay hökümiti Uyghur diyarida yürgüzüwatqan dölet térrorluqini téximu kücheytishke urunmaqta

• Muxbirimiz sada
  2019-06-06

Nöwette Uyghur diyaridiki üch milyondin artuq Uyghur, qazaq qatarliq türkiy milletler xitayning jaza lagérlirigha qamiliwatqan, rayondiki kishilik hoquq we normal diniy erkinlik qattiq cheklimige uchrawatqan bir mezgilde xitay döletlik j x ministirliqi Uyghur diyarigha mexsus sen'et ömiki ewetip, rayondiki saqchilardin “Hal sorighan”.

“Xitay xewerliri” torining bügün, yeni 6-iyundiki widiyoluq xewerdin melum bolushiche, xitay j x ministirliqi 3-iyun ürümchi sheherlik j x idariside “Hal sorash” sen'et kéchiliki ötküzgen. Xewerde mezkur kéchilikning asasiy meqsiti rayondiki herqaysi qatlamdiki saqchi xadimlirining Uyghur diyarida qiliwatqan “Aldinqi sep” xizmetlirini “Medhiyelesh” we “Ilhamlandurush” ikenliki teshwiq qilin'ghan.

Xewerde yene Uyghur diyaridiki asasiy qatlam saqchi xadimlirining “Qoshmaq tughqan” liriningmu qatnashqanliqi nuqtiliq tilgha élin'ghan.

Mezkur widiyoluq xewerde sen'et kéchilikke riyasetchilik qilghan xitay j x ministirliqining bir ayal xadimi kéchilik heqqidiki tesiratini bayan qilip, 2006-yilidin hazirghiche Uyghur diyarigha töt qétim oyun qoyghili kelgenlikini, bu qétim rayonning téximu tinch we muqim bolghanliqini yene bir qétim hés qilghanliqini alahide éytip ötken.

Xewerde yene xitay j x ministirliqining Uyghur diyaridiki Uyghurlar zich olturaqlashqan qeshqer, xoten qatarliq sheherler we bingtüen'ge bérip oyun qoyidighanliqi, bu kéchilikning tibet rayonigha qeder kéngiyidighanliqi qeyt qilin'ghan.

Nöwette xitay hökümiti Uyghur diyaridiki Uyghurlarni qattiq teqib astigha élip, rayonda dölet térrorluqi yürgüzüwatqan bir peytte, atalmish “Hal sorash” namidiki pa'aliyetlerni uyushturushi shundaqla buning xitay üchün eng sezgür bolghan tibet rayonidimu ötküzülüshi diqqet qozghidi.

Közetküchiler xitay hökümiti bu qilmishi arqiliq Uyghur diyaridiki saqchi tarmaqlirini rayondiki basturush siyasitini téximu kücheytishke ilhamlanduruwatqanliqini texmin qilmaqta.