Америка дөләт мәҗлиси әзалири тәйвәнни зиярәт қилған

Мухбиримиз җәвлан
2022.08.15
Share on WhatsApp
Share on WhatsApp

Америка авам палата рәиси нәнси пелоси тәйвәнни зиярәт қилғандин кейин, америка билән хитайниң мунасивити күнсайин җиддийлишиватқан бир вәзийәттә америка дөләт мәҗлиси әзалири 8-айниң 14-күни тәйвәнгә йетип келип икки күнлүк зияритини башлиған.

Ройтрес агентлиқиниң хәвәр қилишичә, америка кеңәш палата әзаси, америка дөләт мәҗлиси шәрқий асия мунасивәтлири, һинду-тинч окян тор бихәтәрлики комитетиниң рәиси ед марки (Ed Markey),  америка дөләт мәҗлиси ядро қорал вә һәрбий қоралларни контрол қилиш гурупписи әзалиридин җон гараменди (John Garamendi) , дон бийир (Don Beyer) қатарлиқ төт нәпәр кеңәш палата әзаси 15-авғуст күни әтигәндә тәйвән президенти сәй йиңвен билән көрүшидикән. Уларниң бу қетимлиқ зиярити һинду-тинч окян районида елип баридиған кәң даирилик зияритиниң бир қисми һесаблинидикән.

Тәйвән президент мәһкимисиниң бу зиярәт һәққидики баянатида мундақ дейилгән: “хитай армийәсиниң һәрбий мәшқлири давамлишиватқан, тәйвәнгә селиватқан тәһдит-бесимлири күчийиватқан бир вәзийәттә, ед марки башчилиқидики бу өмәкниң тәйвәнни зиярәт қилиши америка дөләт мәҗлисиниң тәйвәнни қоллайдиғанлиқини йәнә бир қетим намайән қилди”.

Хитайниң америкада турушлуқ әлчиханиси буниңға инкас билдүрүп: “америка дөләт мәҗлиси әзалири чоқум ‛бир хитай принсипи‚ бойичә иш қилиши керәк; өткәнки зиярәт американиң тәйвәнни қалаймиқан қилиш, хитайниң ичкий ишлириға арилишиш ғәризини көрсәтти” дегән. 

Америка дөләт хәпсизлики комитетиниң баянатчисиму сөз қилип: “америка дөләт мәҗлиси әзалири нәччә он йилдин бери тәйвәнни зиярәт қилип кәлди, буниңдин кейинму шундақ қилиду. Бу қетимқи зиярәтму американиң бир хитай сияситигә уйғун келиду” дегән.

Хәвәрдә ейтилишичә, бу өмәк тәйвән рәһбәрлири билән көрүшүп, америка-тәйвән мунасивити, район бихәтәрлики, ташқи сода ,мәбләғ селиш, мал тәминләш линийәси, килимат өзгириши қатарлиқ мәсилиләрни музакирә қилидикән.

Әлҗәзирә қанилиниң  13-авғуст күни хәвәр қилишичә, америка һәрбий парахотлири билән айропиланлири алдимиздики бир нәччә һәптидә тәйвән боғузидин өтидикән; америка президенти җов байденниң мәслиһәтчисиниң билдүрүшичә, нөвәттә америка билән хитайниң мунасивити җиддий һаләттә туруватқан болсиму, америка йәнила хәлқара қанун даирисидә тәйвән боғузида әркин һәрикәт қилидикән.  

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.