Amérika dölet mejlisi ezaliri teywenni ziyaret qilghan

Muxbirimiz jewlan
2022.08.15
Share on WhatsApp
Share on WhatsApp

Amérika awam palata re'isi nensi pélosi teywenni ziyaret qilghandin kéyin, amérika bilen xitayning munasiwiti künsayin jiddiylishiwatqan bir weziyette amérika dölet mejlisi ezaliri 8-ayning 14-küni teywen'ge yétip kélip ikki künlük ziyaritini bashlighan.

Roytrés agéntliqining xewer qilishiche, amérika kéngesh palata ezasi, amérika dölet mejlisi sherqiy asiya munasiwetliri, hindu-tinch okyan tor bixeterliki komitétining re'isi éd marki (Ed Markey),  amérika dölet mejlisi yadro qoral we herbiy qorallarni kontrol qilish guruppisi ezaliridin jon garaméndi (John Garamendi) , don biyir (Don Beyer) qatarliq töt neper kéngesh palata ezasi 15-awghust küni etigende teywen prézidénti sey yingwén bilen körüshidiken. Ularning bu qétimliq ziyariti hindu-tinch okyan rayonida élip baridighan keng da'irilik ziyaritining bir qismi hésablinidiken.

Teywen prézidént mehkimisining bu ziyaret heqqidiki bayanatida mundaq déyilgen: “Xitay armiyesining herbiy meshqliri dawamlishiwatqan, teywen'ge séliwatqan tehdit-bésimliri küchiyiwatqan bir weziyette, éd marki bashchiliqidiki bu ömekning teywenni ziyaret qilishi amérika dölet mejlisining teywenni qollaydighanliqini yene bir qétim namayen qildi”.

Xitayning amérikada turushluq elchixanisi buninggha inkas bildürüp: “Amérika dölet mejlisi ezaliri choqum ‛bir xitay prinsipi‚ boyiche ish qilishi kérek؛ ötkenki ziyaret amérikaning teywenni qalaymiqan qilish, xitayning ichkiy ishlirigha arilishish gherizini körsetti” dégen. 

Amérika dölet xepsizliki komitétining bayanatchisimu söz qilip: “Amérika dölet mejlisi ezaliri nechche on yildin béri teywenni ziyaret qilip keldi, buningdin kéyinmu shundaq qilidu. Bu qétimqi ziyaretmu amérikaning bir xitay siyasitige uyghun kélidu” dégen.

Xewerde éytilishiche, bu ömek teywen rehberliri bilen körüshüp, amérika-teywen munasiwiti, rayon bixeterliki, tashqi soda ,meblegh sélish, mal teminlesh liniyesi, kilimat özgirishi qatarliq mesililerni muzakire qilidiken.

Eljezire qanilining  13-awghust küni xewer qilishiche, amérika herbiy paraxotliri bilen ayropilanliri aldimizdiki bir nechche heptide teywen boghuzidin ötidiken؛ amérika prézidénti jow baydénning meslihetchisining bildürüshiche, nöwette amérika bilen xitayning munasiwiti jiddiy halette turuwatqan bolsimu, amérika yenila xelq'ara qanun da'iriside teywen boghuzida erkin heriket qilidiken.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.