Хитай һөкүмәт таратқулирида доналд трампқа болған аччиқ тапа-тәнә давамлашмақтикән

Мухбиримиз қутлан
2016-12-19
Share

Америка қошма штатлириниң 45-нөвәтлик президентлиқиға сайланған доналд трампниң хитай һәққидики сөзлири бейҗиң даирилириниң ечишқан ярисиға давамлиқ түрдә туз чачмақтикән.

Игилинишичә, доналд трампниң ақсарайға кириш һарписида хитай тоғрилиқ җамаәткә ашкарилиған бир йүрүш сөз-һәрикәтлири, җүмлидин униң тәйвән президенти сәй йиңвен билән болған телефон сөһбити, хитайниң пул-муамилә вә җәнубий деңиздики қанунсиз қилмишлирини әйиблиши хитайни қаттиқ биарам қилған.

Бирләшмә агентлиқниң хәвиригә қариғанда, алдинқи күни хитай деңиз армийәси америкиниң җәнубий деңиздики хәлқара су районида чөкүп кәткән адәмсиз чарлаш үскүнисини оғрилап кәткән.

Хитай тәрәп буниң пүтүнләй мәзкур су районидики парахотларниң бихәтәрлики үчүн болғанлиқини, адәмсиз чарлаш үскүнисини америкиға қайтуруп беридиғанлиқини билдүргән. Һалбуки, доналд трамп йәкшәнбә күни буниңға инкас қайтуруп: “биз хитайға шуни әскәртмәкчимизки, бизгә улар оғрилап кәткән адәмсиз чарлаш үскүниси әмди лазим әмәс. Улар уни давамлиқ беқивалсун!” дегән.

Доналд трампниң илгирики сөз-һәрикәтлиридин оғиси қайнап турған хитай униң йәкшәнбә күни тивиттәр арқилиқ қилған юқириқи сөзлиридин техиму чичаңлап кәткән. “хәлқ гезити” дәрһал инкас қайтуруп, доналд трампниң сөзлири “қизиқчилиқ болмастин, бәлки хәтәрлик сигналдур,” дегән.

Хитай таратқулири йәнә доналд трампни хәлқара дипломатийәдә “тәҗрибисиз”, у “дәриҗидин ташқири бир чоң дөләтниң рәһбири болушқа мунасип әмәс” дәп әйиблигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт