Xitay hökümet taratqulirida donald trampqa bolghan achchiq tapa-tene dawamlashmaqtiken

Amérika qoshma shtatlirining 45-nöwetlik prézidéntliqigha saylan'ghan donald trampning xitay heqqidiki sözliri béyjing da'irilirining échishqan yarisigha dawamliq türde tuz chachmaqtiken.

Igilinishiche, donald trampning aqsaraygha kirish harpisida xitay toghriliq jama'etke ashkarilighan bir yürüsh söz-heriketliri, jümlidin uning teywen prézidénti sey yingwén bilen bolghan téléfon söhbiti, xitayning pul-mu'amile we jenubiy déngizdiki qanunsiz qilmishlirini eyiblishi xitayni qattiq bi'aram qilghan.

Birleshme agéntliqning xewirige qarighanda, aldinqi küni xitay déngiz armiyesi amérikining jenubiy déngizdiki xelq'ara su rayonida chöküp ketken ademsiz charlash üskünisini oghrilap ketken.

Xitay terep buning pütünley mezkur su rayonidiki paraxotlarning bixeterliki üchün bolghanliqini, ademsiz charlash üskünisini amérikigha qayturup béridighanliqini bildürgen. Halbuki, donald tramp yekshenbe küni buninggha inkas qayturup: “Biz xitaygha shuni eskertmekchimizki, bizge ular oghrilap ketken ademsiz charlash üskünisi emdi lazim emes. Ular uni dawamliq béqiwalsun!” dégen.

Donald trampning ilgiriki söz-heriketliridin oghisi qaynap turghan xitay uning yekshenbe küni tiwitter arqiliq qilghan yuqiriqi sözliridin téximu chichanglap ketken. “Xelq géziti” derhal inkas qayturup, donald trampning sözliri “Qiziqchiliq bolmastin, belki xeterlik signaldur,” dégen.

Xitay taratquliri yene donald trampni xelq'ara diplomatiyede “Tejribisiz”, u “Derijidin tashqiri bir chong döletning rehbiri bolushqa munasip emes” dep eyibligen.