Пирезидент доналд трамп: “ши җинпиң билән алақилишип туруватимән”

Пат йеқинда вәзипигә олтуридиған америка пирезиденти доналд трамп хитай компартийәси баш секретари ши җинпиң билән икки тәрәп вәкиллири арқилиқ давамлиқ алақилишип туруватқанлиқини билдүргән.

 “ройтерс агентлиқи” ниң 6-декабирдики хәвиридә ейтилишичә, доналд трамп йеқинда бир телевизийә пирограммисида риясәтчиниң соалиға бәргән җавабида ши җинпиң билән васитилик шәкилдә алақә қиливатқанлиқини билдүрүп, “биз уларниң вәкиллири арқилиқ давамлиқ пикирлишип туруватимиз. Мәнчә биз обдан чиқишип қелишимиз мумкин. Әмма йолимиз айрим” дегән.

Пирезидент доналд трамп хитайниң изчил түрдә америкадин наһәқ усулда нәп елишиға қарши туруп келиватқан болуп, сайлам мәзгилидә қилған сөзидә хитайдин 60 пирсәнт баҗ алидиғанлиқини, хитайдин кириватқан фенталинни чәкләш үчүн, йәнә 10 пирсәнт баҗ қошидиғанлиқини елан қилғаниди. Пирезидент доналд трамп вәзипигә олтуруш мурасимиға ши җинпиңни тәклип қилған болсиму, ши җинпиңниң бармайдиғанлиқи мәлум болғаниди.

Хәвәрдә қәйт қилинишичә, хитай ташқи ишлар министирлиқи баянатчиси го җяшен 1-айниң 7-күни ахбарат елан қилиш йиғинида бәргән баянатида, хитайниң һәр вақит доналд трампниң сөзлиригә диққәт қилидиғанлиқини билдүргән. У йәнә хитайниң “америка билән болған сода мунасивитиниң муқим вә сағлам раваҗлинишини илгири сүрүшини, шуниңдәк бир-бирини һөрмәт қилип, бир-бири билән һәмкарлишип ортақ мәнпәәт елиш” ни үмид қилидиғанлиқини билдүргән.

Көзәткүчиләрниң билдүрүшичә, доналд трампниң йеңи һөкүмәт кабентидики сиясәтчиләрниң көпинчиси хитайға қаттиқ қол болушни тәшәббус қилидиған кишиләр болуп, хитай тәрәп буниңдин бесим һес қилған һәмдә алди билән доналд трампни майил қилишниң йоллирини издәватқан болуши мумкин икән.